Rəqəmsal hökumət modeli çərçivəsində vətəndaşlar artıq “mygov” platformasından dövlət qurumlarına rəsmi elektron məktub göndərə bilərlər. Eyni zamanda qurumlar da vətəndaşlara bildirim və cavab məktubları birbaşa göndərə biləcək. Bu xidmət İnnovasiya və Rəqəmsal İnkişaf Agentliyinin Rəqəmsal Sənəd Dövriyyəsi sistemi ilə həyata keçirilir.
Müraciət prosesi sadədir: “mygov” ana səhifəsindən “Dövlət qurumlarına rəsmi məktub” bölməsinə keçin, qurum seçin, başlıq və mətn yazın, lazım olsa fayl əlavə edin. SİMA və ya ASAN rəqəmsal imza ilə təsdiqlədikdən sonra məktub avtomatik quruma çatır. “Göndərilən” bölməsində statusu real vaxtda izləyə bilərsiniz, cavablar “Gələn” qovluğuna düşəcək. Qanuna uyğun olaraq cavab 15 iş günü (mürəkkəb hallarda 30 gün) ərzində gəlməlidir.
Platformada 59 dövlət qurumu inteqrasiya olunub, tezliklə hamısı əhatə oluna biləcək. İlk ayda 11 min məktub mübadiləsi baş vermişdir. Ən aktiv qurumlar Əmək və Əhalinin Sosial Müdafiəsi Nazirliyi, Ədliyyə Nazirliyi və “ASAN Xidmət”dir. Bu yenilik kağız əməliyyatlarını minimuma endirərək kommunikasiyanı sürətləndirir.
