Azərbaycanda əhalinin faktiki yaşayış yerini əsas götürən vahid məlumat bazası yaradılır. Məcburi Tibbi Sığorta üzrə Dövlət Agentliyi əhalinin faktiki yaşayış yerini əsas götürən informasiya bazasının formalaşdırılması üzərində işləyir.
Bərdə üzrə pilot layihə və təhkimolunma
Zaur Əliyevin sözlərinə görə, ilkin səhiyyə şəbəkəsinin optimallaşdırılması hazırda pilot olaraq Bərdə rayonunda sınaqdan keçirilir.
Rayon üzrə yeni Ailə Sağlamlıq Mərkəzi yaradılıb, 31 tibb məntəqəsi həkim məntəqələri ilə birləşdirilib. Nəticədə 110 kənd və şəhər mərkəzi 2 ailə sağlamlıq mərkəzi, 34 həkim məntəqəsi və 18 tibb məntəqəsi vasitəsilə əhatə olunur.
Sədr bildirib ki, əhalinin tibb müəssisələrinə təhkimolunma prosesinə artıq start verilib və bu mərhələ təxminən 3,5 milyon nəfəri əhatə edəcək: “Əhalinin faktiki yaşayış yerinə əsaslanan vahid məlumat bazası tibbi xidmətlərin daha ünvanlı və səmərəli planlaşdırılmasına imkan verəcək”.
Şəbəkənin optimallaşdırılması və kadr hazırlığı
Bərdədə kadr potensialının gücləndirilməsi üçün 43 modul üzrə 60 ailə həkimi, 10 modul üzrə isə 250-dən çox tibb bacısı üçün peşəkar təlimlər təşkil edilib.
Ümumilikdə ölkə miqyasında 78 ailə sağlamlıq mərkəzinin, 871 həkim məntəqəsinin, 1 168 tibb məntəqəsinin və Bakıda fəaliyyət göstərən 106 ambulator-poliklinika müəssisəsinin struktur baxımından optimallaşdırılması planlaşdırılır.
Zaur Əliyev vurğulayıb ki, bu islahatlar ilkin səhiyyə xidmətlərinin əlçatanlığını artıracaq, xidmət keyfiyyətini yüksəldəcək və şəbəkənin idarə olunmasını daha çox avtomatlaşdıracaq.
Yeni baza həmçinin resursların regionlar üzrə balanslı bölüşdürülməsinə, təcili yardım və profilaktik tədbirlərin daha düzgün hədəflənməsinə şərait yaradacaq.
