Uğurlu aktyor karyerası böyük gəlir deməkdir, amma bəzi Hollivud ulduzları üçün əsas sərvət məhz biznesdən gəlib. Onlar kameralar qarşısında deyil, düzgün investisiya və sahibkarlıq qərarları sayəsində yüz milyonlarla dollar qazanıblar. Budur, kino sənayesindən kənarda böyük maliyyə uğuru əldə edən beş məşhur sima.
Gvinet Peltrou – Goop imperiyasının qurucusu
2008-ci ildə Gwyneth Paltrow sadə elektron bülletenlə başlayan Goop layihəsini qısa müddətdə böyük həyat tərzi brendinə çevirdi. Əvvəlcə sağlamlıq və gözəlliklə bağlı tövsiyələr paylaşan aktrisa sonradan kosmetika, dəriyə qulluq vasitələri və müxtəlif premium məhsullar satışına başladı. Bu gün Goop:
- öz sammitlərini təşkil edir
- eksklüziv məhsul xəttinə malikdir
- təxminən 250 milyon dollarlıq kapitalla qiymətləndirilir
Brend xüsusilə qeyri-adi marketinq addımları ilə diqqət çəkib və Peltrounun gəlir mənbəyində əsas paya sahibdir.
Bleyk Layvli və Rayan Reynolds – ailəvi biznes tandemi
Ryan Reynolds 2018-ci ildə Aviation Gin markasının ortaq sahibi oldu və iki il sonra brendi Diageo şirkətinə 610 milyon dollara satdı. Bu satış aktyorun biznes bacarığını təsdiqlədi.
Onun həyat yoldaşı Blake Lively isə Betty Buzz adlı kokteyl mikserləri brendini qurdu. Layvli Forbes-ə müsahibəsində belə demişdi: “Mən həmişə dostlarım üçün içkilər hazırlayırdım. Bu mənim üçün təbii idi”.
Cütlük həm də reklam və kreativ layihələrdə birgə işləyərək bizneslərini böyütməyi bacarıb.
Cessika Alba – təhlükəsiz məişət ideyasından milyardlıq şirkətə
2012-ci ildə Jessica Alba uşaqlar üçün təhlükəsiz və ekoloji məhsullar istehsal etmək məqsədilə The Honest Company-ni təsis etdi. İlk mərhələdə 17 məhsulla start verən şirkət bir il ərzində 50 milyon dollar satış dövriyyəsinə çatdı.
2015-ci ildə şirkətin dəyəri 1,7 milyard dollar olaraq qiymətləndirildi. Məhsul çeşidinə daxildir:
- təmizləyici vasitələr
- uşaq bezləri
- kosmetika
- geyim və qulluq məhsulları
Şirkətin gəlirlərinin böyük hissəsi abunə modeli üzərindən formalaşır.
Corc Kluni – tekila ilə milyardlıq müqavilə
George Clooney 2013-cü ildə dostları ilə birlikdə Casamigos tekila brendini yaratdı. 2017-ci ildə bu marka təxminən 1 milyard dollara satıldı. Sonrakı illərdə Casamigos ən sürətlə böyüyən premium spirtli içki brendlərindən birinə çevrildi.
Bundan əlavə, Kluni 2006-cı ildən Nespresso brendinin simasıdır və bu əməkdaşlığın ona on milyonlarla dollar qazandırdığı bildirilir.
Riz Uizerspun – prodüserlikdən 900 milyonluq satışa
Reese Witherspoon 2016-cı ildə Hello Sunshine prodüser şirkətini təsis etdi. Şirkət “Big Little Lies” və “The Morning Show” kimi uğurlu layihələrə imza atdı.
2021-ci ildə Hello Sunshine 900 milyon dollara satıldı. Bundan əlavə, aktrisa Draper James geyim brendini də yaradıb və 2023-cü ildə şirkətdəki payının bir hissəsini sataraq əlavə gəlir əldə edib.
Beləliklə, bu beş ulduz sübut edir ki, Hollivud şöhrəti düzgün biznes strategiyası ilə birləşəndə kino qonorarından qat-qat böyük qazanc gətirə bilər.
