Milli Məclis emal edilməmiş almazların müvafiq rəy olmadan ölkəyə gətirilməsi və ölkədən çıxarılmasına görə tətbiq ediləcək inzibati cərimələri üçüncü oxunuşda qəbul edib. Dəyişikliklər “Gömrük Məcəlləsi”, “İnzibati Xətalar Məcəlləsi” və “Qiymətli metallar və qiymətli daşlar haqqında” Qanuna şamil olunur.
Qəbul edilən dəyişikliklərə əsasən, emal edilməmiş almazların müvafiq icra hakimiyyəti orqanının müəyyən etdiyi qurumun rəyi olmadan idxalı və ya ixracı inzibati məsuliyyət yaradır. Cərimələrin məbləği hüquqi statusdan asılı olaraq fərqlənir:
- fiziki şəxslər üçün – 550 manatdan 750 manatadək;
- vəzifəli şəxslər üçün – 1000 manatdan 2000 manatadək;
- hüquqi şəxslər üçün – 1500 manatdan 2500 manatadək.
Dövlət nəzarəti gücləndirilir
Qanuna edilən digər dəyişikliklər emal edilməmiş almazların idxalı, ixracı, istifadəsi, dövriyyəsi, uçotu, saxlanılması və izlənməsi üzərində dövlət nəzarətinin mexanizmlərini dəqiqləşdirir.
Bundan sonra “Kimberli Sertifikatlaşdırma Prosesinin Sxemi” çərçivəsində ixrac üçün tələb olunan sertifikatın forması və verilmə qaydaları müvafiq icra hakimiyyəti orqanının müəyyən etdiyi qurum tərəfindən təsdiqlənəcək.
Eyni zamanda, ölkəyə emal edilməmiş almazların idxalı və ixracı yalnız “Kimberli Prosesinin Sertifikatlaşdırma Sxemi”nə üzv olan dövlətlər vasitəsilə həyata keçirilə biləcək. Bu mexanizm beynəlxalq səviyyədə qanunsuz almaz ticarətinin qarşısının alınmasına yönəlib.
Layihə parlamentdə müzakirələrdən sonra səsverməyə çıxarılıb və son oxunuşda qəbul olunub. Qanun qüvvəyə mindikdən sonra almaz dövriyyəsi sahəsində fəaliyyət göstərən şəxslər və şirkətlər üçün yeni qaydalar məcburi olacaq.
