Şahdağ Turizm Mərkəzində təşkil olunması nəzərdə tutulan dağ xizəyinin moqul proqramı üzrə Dünya Kuboku mərhələsi təxirə salınıb.
Beynəlxalq Xizək və Snoubord Federasiyası (FIS) hazırlıq prosesini qiymətləndirdikdən sonra yarışın keçirildiyi ərazidə mövsümi şəraitin tələb olunan standartlara tam uyğun gəlmədiyini bildirib.
FIS: Yarış üçün ideal şərait hazırda mövcud deyil
FIS-in açıqlamasında qeyd olunub ki, yarışın miqyası və yüksək səviyyəli təşkil tələbləri mövcud hava və təbii qar örtüyü fonunda tam təmin edilmir.
Federasiya həmçinin logistika sahəsində yaranan bir sıra çətinliklərin — səfər marşrutlarının məhdudluğu və bəzi regional hava limanlarında müvəqqəti məhdudiyyətlərin — iştirakçılarla yanaşı, tamaşaçıların da rahatlığına təsir göstərə biləcəyini vurğulayıb.
Qurumun məlumatında deyilir:
“Azərbaycan yarışa ev sahibliyi etməyə tam hazır olsa da, həm bizim, həm də yerli təşkilatçıların əsas məqsədi Dünya Kubokunun ən optimal şəraitdə baş tutmasını təmin etməkdir. Bu səbəbdən Şahdağda moqul üzrə Dünya Kuboku finallarının növbəti qış mövsümünə keçirilməsi barədə birgə qərara gəlinib.
Bu addım daha yüksək keyfiyyətli idman mühitinin yaradılmasına imkan verəcək. Azərbaycan beynəlxalq qış idman ictimaiyyətini gələn mövsümdə Şahdağda qarşılamağı səbirsizliklə gözləyir.”
Xatırladaq ki, Dünya Kubokunun Azərbaycan mərhələsi bu ilin martın 14-15-də baş tutmalı idi. Yarışın yeni tarixi yaxın aylarda FIS tərəfindən açıqlanacaq.
