Dünya enerji bazarında Azərbaycan nefti kəskin bahalaşma nümayiş etdirib. “Azeri Light” markalı neftin bir bareli 8,41 ABŞ dolları və ya təxminən 8,9 faiz artaraq 103,03 ABŞ dollarına yüksəlib.
Eyni vaxtda “Brent” markalı neftin may fyuçersləri də 102,84 dollar səviyyəsində qərarlaşıb ki, bu da beynəlxalq bazarda gərginliyin hələ də yüksək qaldığını göstərir.
Bahalaşmanın arxasında nə dayanır?
Son günlər qlobal neft bazarında əsas hərəkətverici amil Yaxın Şərqdə artan risklər və tədarük marşrutları ilə bağlı narahatlıqlar olub. Beynəlxalq bazarda qiymətlərin sürətlə yuxarı qalxması “Azeri Light” kimi yüksək keyfiyyətli markalara da birbaşa təsir edib.
Bu fonda Türkiyənin Ceyhan limanında FOB bazasında Azərbaycan neftinin bir bareli 99,10 dollara qədər bahalaşıb. Azərbaycanın 2026-cı il dövlət büdcəsində isə bir barel neftin orta qiyməti 65 ABŞ dolları səviyyəsində götürülüb.
Yəni hazırkı bazar göstəricisi büdcə hesablamasını xeyli qabaqlayır və neft gəlirləri baxımından daha əlverişli mənzərə yaradır. Martın əvvəlində “Azeri Light”ın 94,62 dollara yüksəlməsi də bu artım trendinin bir neçə gündür gücləndiyini göstərirdi.
Tarixi diapazon və AÇG-nin rolu
“Azeri Light” üzrə tarixi minimum 2020-ci il 21 aprel tarixində 15,81 dollar, maksimum isə 2008-ci ilin iyulunda 149,66 dollar olaraq qeydə alınıb.
Azərbaycanda bu neft markası “Azəri-Çıraq-Dərin Sulu Günəşli” yataqlar blokundan hasil olunur. bp-nin açıqladığı son rəsmi məlumatda AÇG layihəsində SOCAR-ın payının 31,65 faiz olduğu göstərilir.
