“Azərbaycan Dəmir Yolları” QSC (ADY) yağışlı və küləkli hava şəraitində yarana biləcək çətinliklərin qarşısını almaq üçün zəruri addımlar atır.
ADY-dən verilən məlumata görə, qatarlar hazırda müəyyən edilmiş qrafik üzrə hərəkət edir və bütün infrastruktur obyektlərinə daimi monitorinq tətbiq olunur.
Buna baxmayaraq, bəzi sahələrdə sürət həddinə məhdudiyyətlərin qoyulması ilə əlaqədar hərəkət cədvəlindən cüzi kənarlaşmalar istisna edilmir.
ADY vurğulayır ki, intensiv külək və yağıntılar qatarların görünmə dərəcəsini azalda, həmçinin səs siqnallarının eşidilməsini çətinləşdirə bilər. Bununla əlaqədar olaraq, sərnişinlərə stansiya və platformalarda olarkən daha diqqətli və ehtiyatlı olmaq tövsiyə edilir.
