Futbol azarkeşləri üçün maraqlı və qeyri-adi iş təklifi ortaya çıxıb. Fox Sports və Indeed birlikdə “Dünya çempionatının baş tamaşaçısı” adlı vakansiya elan edib. Bu vəzifə üçün seçiləcək şəxsə 50 min dollar məbləğində maaş təklif olunur.
Layihə çərçivəsində seçilən namizəd 2026 FIFA World Cup zamanı keçiriləcək bütün oyunları izləməli və yarışla bağlı müxtəlif məzmunlar hazırlamalıdır. Bu təşəbbüs turnirin miqyasına uyğun olaraq fərqli və diqqətçəkən yanaşma kimi qiymətləndirilir.
“Bu, həyatın işi ola bilər”
Fox Sports-un marketinq üzrə prezidenti Robert Gottlieb bildirib ki, 2026-cı il dünya çempionatı tarixə düşəcək turnir olacaq və buna uyğun olaraq seçilən şəxsin rolu da xüsusi əhəmiyyət daşıyacaq:
“Bir nəfər bu möhtəşəm oyunun bütün hekayələrini, komandalarını və emosiyalarını birbaşa yaşamaq imkanı əldə edəcək. O, 104 oyunun hamısını izləməli, kontent yaratmalı və Times Squaredə keçiriləcək tədbirlərdə iştirak etməlidir”.
Onun sözlərinə görə, bu iş həm futbol sevgisini, həm də yaradıcılıq bacarıqlarını birləşdirən nadir imkanlardan biridir.
Tarixi turnir və geniş proqram
2026-cı il dünya çempionatı əvvəlkilərdən fərqli olaraq daha geniş miqyasda keçiriləcək. Yarış ABŞ, Kanada və Meksikada baş tutacaq və ümumilikdə 104 oyun oynanılacaq. Bu da turniri tarixdə ən uzun və ən çox matçlı mundiallardan birinə çevirir.
Turnir iyunun 11-də başlayacaq və iyulun 19-dək davam edəcək. Yeni format sayəsində daha çox komanda iştirak edəcək və azarkeşlər daha çox oyun izləmək imkanı qazanacaqlar. Seçiləcək şəxs üçün əsas vəzifə sadəcə oyunlara baxmaq deyil, eyni zamanda bu təcrübəni izləyicilərlə bölüşmək olacaq.
