Netflix platformasında dünya pop musiqisinin məşhur simalarından biri olan Kayli Minouq haqqında yeni sənədli filmin premyerası baş tutub. Layihədə avstraliyalı sənətçi ilk dəfə şəxsi arxiv görüntülərini təqdim edərək həm karyerası, həm də şəxsi həyatı ilə bağlı indiyədək açıqlamadığı məqamları bölüşüb.
Sənədli film Kaylinin televiziya serialı “Neighbours”dakı ilk addımlarından başlayaraq dünya səviyyəli pop ulduzuna çevrilməsinə qədər keçdiyi yolu əhatə edir. Ekran işində nadir ailə videoları, eksklüziv fotolar və yeni müsahibələr yer alıb.
Kayli xəstəliyi ilə bağlı səmimi etiraflar edib
Filmdə müğənni şöhrətin yaratdığı təzyiq, şəxsi itkilər və onkoloji xəstəliklə mübarizəsi barədə açıq danışır. Kayli Minouq bildirib ki, 2021-ci ildə ona yenidən xərçəng diaqnozu qoyulub. O, daha əvvəl 2005-ci ildə süd vəzi xərçənginə qalib gəlmişdi.
Sənətçi qeyd edib ki, vaxtında aparılan tibbi müayinələr xəstəliyin erkən mərhələdə aşkarlanmasına və müalicənin uğurla nəticələnməsinə kömək edib. Film boyunca Kayli həm emosional çətinliklərini, həm də həyata baxışının necə dəyişdiyini tamaşaçı ilə bölüşür.
Müğənninin ağır xəstəlikdən sonra yaşadığı hisslər və şəxsi açıqlamaları barədə daha geniş məlumat Kayli Minouq xərçənglə mübarizəsindən danışdı məqaləsində yer alıb.
Filmin rejissoru məşhur layihələrin müəllifidir
Sənədli filmin rejissoru Emmy və BAFTA mükafatçısı Maykl Hartdır. O, daha əvvəl Devid Bekhem haqqında hazırladığı sənədli layihə ilə də böyük maraq doğurmuşdu.
Kayli Minouq bu günə qədər 80 milyondan çox albom satıb və mahnıları milyardlarla dəfə dinlənilib. Müğənni iki “Qremmi” və 18 ARIA mükafatı qazanıb. “Can’t Get You Out of My Head” və “Padam Padam” kimi hitlər isə onu müasir pop musiqisinin ən uğurlu ifaçılarından birinə çevirib.
