Kabo-Verde millisinin qapıçısı Vozinya 2026-cı il dünya çempionatında İspaniyaya qarşı keçirdiyi yaddaqalan oyundan sonra sosial şəbəkələrdə rekord artım yaşayıb. Təcrübəli qolkiperin “Instagram” hesabına 24 saatdan az müddətdə 5,5 milyondan çox yeni izləyici qoşulub.
Dünya çempionatının H qrupunda keçirilən görüşdə Kabo-Verde favorit hesab olunan İspaniya ilə qolsuz heç-heçə edib. Qarşılaşmanın əsas qəhrəmanlarından biri olan Vozinya qapısını toxunulmaz saxlayaraq yeddi seyv müəllifi olub və komandasına vacib xal qazandırıb.
Bir oyundan sonra ölkənin ən məşhur siması oldu
Matçdan əvvəl təxminən 45 min izləyicisi olan qapıçı qısa müddətdə sosial medianın ən çox danışılan idmançılarından birinə çevrilib. Əhalisi təxminən 530 min nəfər olan Kabo-Verde üçün bu göstərici xüsusi diqqət çəkir.
Vozinya hazırda sosial şəbəkələrdə Kabo-Verde pasportu daşıyan şəxslər arasında ən böyük auditoriyaya sahibdir. Bununla o, uzun illər bu sahədə lider olan, Portuqaliya millisində çıxış etmiş kaboverdeli əsilli Luis Nanini də geridə qoyub. Naniyə məxsus hesabın izləyici sayı təxminən 4,3 milyon təşkil edir.
İspaniyaya qarşı oyundan sonra Vozinya matçın ən yaxşı futbolçusu seçilib. Onun inamlı çıxışı dünya mediasında geniş rezonans doğurub və Kabo-Verdenin turnirin ilk turundakı ən böyük uğurlarından biri kimi qiymətləndirilib.
Hazırda Portuqaliyanın “Şaveş” klubunda çıxış edən qapıçı karyerası ərzində Slovakiya, Moldova və Kipr çempionatlarında da forma geyinib. Dünya çempionatındakı parlaq performans isə onun adını qlobal futbol ictimaiyyətinin diqqət mərkəzinə çıxarıb.
