Azərbaycanda istehsal olunan Fermazza 82% yağlı kərə yağı ilə bağlı ciddi uyğunsuzluq aşkarlanıb. Azərbaycan Respublikasının Qida Təhlükəsizliyi Agentliyi (AQTA) tərəfindən aparılan monitorinq zamanı məhsulun tərkibində bitki sterinlərinin (stiqmasterin, kampesterin, beta-sitosterin) olduğu müəyyən edilib. Bundan əlavə, yağın yağ turşuları tərkibi də normativlərə uyğun gəlməyib.
Məhsulda təbii inək südü deyil, bitki yağları tapılıb
AQTA-nın rəsmi açıqlamasına görə, Fermazza markalı kərə yağının tərkibində yalnız təbii inək südündən alınmış pastörizə olunmuş qaymaq olduğu bildirilsə də, laborator analizlər bu iddianın yanlış olduğunu üzə çıxarıb. Tərkibə əlavə olunan bitki yağları istehlakçıların aldadılması ilə nəticələnib, bu isə istehlakçı hüquqlarının pozulması deməkdir.
Fermazza yağı satışdan geri çağırıldı
Agentlik saxta məhsulu istehsal edən Azza-Aqro ASC barəsində inzibati tədbirlər görüb. Fırıldaqçılıq aşkar edilən məhsullar satışdan tamamilə çıxarılıb və ticarət şəbəkələrindən geri çağırılıb. Bununla yanaşı, şirkətə ciddi xəbərdarlıq edilib və müvafiq məcburi göstərişlər verilib.
