ABŞ prezidenti Donald Tramp siyasi rəqibi Co Baydenin səhhəti ilə bağlı yayılan xəbərlərə münasibət bildirib. O, rəqibinə tamamilə qeyri-adi şəkildə – anlayış və dəstək nümayiş etdirib.
Daylinews-az.com xəbər verir ki, Tramp bu barədə şəxsi “Truth Social” sosial şəbəkəsində yazıb. Onun sözlərinə görə, həyat yoldaşı Melaniya ilə birlikdə bu xəbərdən sarsılıblar və Baydenin tezliklə sağalmasını arzulayırlar:
“Melaniya və mən Baydenin xəstəliyi ilə bağlı xəbərləri eşidəndə kədərləndik. Jillə və ailəsinə də dəstəyimizi ifadə edir, Co’ya güc və sağlamlıq arzulayırıq”, – deyə Tramp yazıb.
Trampın bu səmimi mesajı siyasi dairələrdə rezonans doğurub, çünki iki siyasətçi son illərdə sərt qarşıdurmaları ilə yadda qalıb. Bu dəfə isə insanlıq və etik jest ön planda olub.
Xatırladaq ki, ötən həftə 82 yaşlı Baydenin prostat vəzində aqressiv xərçəng forması aşkarlanıb. Həkimlər onun sümük toxumasında da metastazların olduğunu bildiriblər. Baydenin komandası onun müalicə planı üzərində işlədiklərini və vəziyyətin nəzarət altında olduğunu bəyan edib.
