Azərbaycanda kibersuverenliyin təmin olunması dövlətin prioritet vəzifələrindən biri kimi gündəmdədir. Bu, həm kritik infrastrukturun qorunması, həm də vətəndaşların hüquqlarının müdafiəsi baxımından xüsusi əhəmiyyət kəsb edir.
Milli Məclisdə kibertəhlükəsizlik müzakirə edildi
Daylinews-az.com xəbər verir ki, bu barədə deputat Nizami Səfərov Milli Məclisin bu gün keçirilən plenar iclasında çıxış edərkən danışıb.
Deputat qeyd edib ki, Prezidentin 19 mart 2025-ci il tarixli sərəncamı ilə təsdiqlənən “Azərbaycan Respublikasının 2025–2028-ci illər üzrə Süni İntellekt Strategiyası”nda milli təhlükəsizliyin təmin olunması üçün rəqəmsal alətlərin etibarlılığının artırılması əsas hədəflərdən biridir. Strateji sənəddə informasiya təhlükəsizliyi, məlumat manipulyasiyası və dezinformasiyalara qarşı mübarizə, süni intellekt sistemlərinin qorunması da ön plandadır.
Kiberdələduzluğun fəsadları artmaqdadır
Deputat vurğulayıb ki, son dövrlərdə dövlət və ictimai xadimlərin adından süni intellekt vasitəsilə yayılan saxta videomüraciətlər, bank etimadından sui-istifadə edərək sosial şəbəkələrdə yalan məlumatların tirajlanması, vətəndaşların bank kartlarından böyük məbləğlərin oğurlanması kimi hallar kiberdələduzluğun artan təhdidlərindən xəbər verir.
Nizami Səfərov rəsmi statistikaya əsaslanaraq bildirib:
- 2024-cü ildə vətəndaşlara vurulan ümumi maddi zərər 22 milyon manatdan artıq olub;
- 2025-ci ilin ilk dörd ayında isə bu rəqəm 6 milyon manat təşkil edib.
Deputat qeyd edib ki, aidiyyəti dövlət qurumları kibercinayətkarlıqla mübarizə üçün zəruri tədbirlər görür. Bununla belə, cinayətlərin yeni formalarının yaranması və sürətlə transformasiyası mövcud qanunvericiliyin təkmilləşdirilməsini və qabaqlayıcı tədbirlərin gücləndirilməsini zəruri edir.
