Azərbaycanda I, II, III və IV ixtisas qrupları üzrə ali təhsil müəssisələrinə qəbulun ikinci mərhələsi çərçivəsində ikinci cəhd imtahanı üçün qeydiyyat prosesi start götürüb.
Daylinews-az.com xəbər verir ki, bu barədə Dövlət İmtahan Mərkəzi (DİM) məlumat yayıb.
Qeydiyyat müddəti: 26 may – 12 iyun 2025
Abituriyentlər 26 maydan 12 iyuna qədər şəxsi kabinetlərinə daxil olaraq (https://eservices.dim.gov.az/erizebak/cehd2/) seçdikləri ixtisas qrupu üzrə qeydiyyatdan keçməli və ödəməni sistem vasitəsilə həyata keçirməlidirlər. Sistem abituriyentə avtomatik olaraq ödəniş barədə məlumat verir.
Dövlət hesabına imtahanda iştirak hüququ olan şəxslər:
Aşağıdakı kateqoriyadan olan, ümumtəhsil müəssisələrinin məzunu sayılan Azərbaycan Respublikası vətəndaşları imtahanda dövlət büdcəsinin vəsaiti hesabına iştirak edə bilərlər:
- Azərbaycan Respublikasının ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar əlil olmuş şəxslərin övladları;
- Şəhid ailələrinin üzvləri;
- Valideynlərini itirmiş və valideyn himayəsindən məhrum olmuş uşaqlar;
- Məcburi köçkün statusu olan şəxslər;
- I və II qrup əlilliyi olan şəxslər, o cümlədən 18 yaşadək sağlamlıq imkanları məhdud uşaqlar.
Bu şəxslər haqqında məlumatlar aidiyyəti icra orqanlarının informasiya sistemləri vasitəsilə DİM-ə təqdim olunub.
Əlavə vacib məlumatlar:
- Qeydiyyatdan yalnız müəyyən olunmuş müddətdə keçmiş şəxslər imtahanda iştirak edə biləcəklər.
- Abituriyentlər ikinci cəhd zamanı ilk imtahanda seçdiklərindən fərqli ixtisas qrupunu seçə bilərlər.
- 4 may tarixində keçirilmiş dövlət dili (Azərbaycan dili) imtahanında qeyri-kafi qiymət alan abituriyentlər də yay qəbul imtahanına qeydiyyatdan keçə bilərlər.
Lakin onlar 29 iyun tarixində keçiriləcək ikinci dil imtahanında da qeyri-kafi qiymət alarlarsa, müsabiqəyə buraxılmayacaqlar.
