9 sentyabrda keçirilən təqdimatda Apple yeni nəsil cihazlarını — iPhone 17, iPhone 17 Pro və Pro Max, iPhone Air, üç model Apple Watch və AirPods Pro 3-ü göstərdi. Bununla yanaşı, şirkət iOS 26 əməliyyat sisteminin buraxılış tarixini də açıqladı: yenilənmə 15 sentyabrda iPhone, iPad və Apple Watch sahibləri üçün əlçatan olacaq.
Yeni dizayn: Liquid Glass
iOS 26-nın əsas vizual yeniliyi Liquid Glass interfeysidir. Bu funksiya ikonaları və elementləri “canlı” və şəffaf göstərir. İstifadəçilər, məsələn, əsas ekrandakı ikonaları yarı şəffaf edə biləcək və fon şəklini ön plana çıxara biləcəklər. Bundan başqa, tətbiqlərdə idarəetmə daha dinamik olacaq — Apple Music və digər proqramlarda səhifələr artıq tək-tək kliklə deyil, sürüşdürmə ilə dəyişdiriləcək.
Apple Intelligence funksiyaları
iOS 26 süni intellekt əsaslı bir sıra imkanlar təqdim edir:
- Live Translation — mesajların, zənglərin və FaceTime danışığının real vaxtda tərcüməsi (ingilis, fransız, alman, ispan, portuqal və digər dillər).
- AirPods Pro 3-də tərcümə — qulaqlıqlar ətrafdakı söhbəti eşidir və anında tərcümə edir.
- Call Screening — tanımadığınız nömrədən gələn zəngə iPhone özü cavab verir, zəng edən şəxsin adını və səbəbini öyrənir, sonra qəbul edib-etməmək qərarını siz verirsiniz.
- Hold Assist — operatorla danışıq üçün gözləmə rejimində telefonu özü saxlayır və cavab hazır olanda sizi xəbərdar edir.
- Mesajlarda yeni filtr, fon dəyişmə imkanı və yenilənmiş sorğular dizaynı əlavə olunub.
Digər yeniliklər
- Apple Maps artıq istifadəçilərin sevimli marşrutlarını yadda saxlayır və gecikmələr barədə öncədən xəbərdarlıq edir.
- Yeni Visited Place bölməsində daha əvvəl gedilmiş restoran, mağaza və digər məkanlar görünür.
- iPad üçün xüsusi funksiya — eyni vaxtda bir neçə pəncərə ilə işləmək imkanı əlavə olunub.
iOS 26 bütün cihazlara eyni anda yayılacaq və yeniliklərin əksəriyyəti 15 sentyabrdan etibarən istifadəyə veriləcək.
