Azərbaycan Qiymətləndiricilər Palatasının açıqladığı son hesabat avtomobil bazarında artımın davam etdiyini göstərir. 2026-cı ilin aprel ayına olan məlumatlara əsasən, ümumi qiymət indeksi 105,8 bəndə çatıb. Bu, 2025-ci ilin dekabrı ilə müqayisədə 5,8%, mart ayı ilə müqayisədə isə 1,3% artım deməkdir.
İkinci əl avtomobillər bazarın lokomotivinə çevrilib
Araşdırmalar göstərir ki, qiymət artımında əsas rol ikinci əl avtomobillərə məxsusdur. Bu seqment üzrə indeks 108,2 bənd olub ki, bu da baza dövrü ilə müqayisədə 8,2%, aylıq müqayisədə isə 2,1% artım deməkdir.
Yeni avtomobillər bazarında isə bahalaşma daha zəif templə gedib. Bu kateqoriyada qiymətlər dekabr ayı ilə müqayisədə 3,5%, mart ayı ilə müqayisədə isə 0,8% yüksəlib.
Bazarın əsas göstəriciləri:
- Ümumi qiymət indeksi – 105,8 bənd
- İkinci əl avtomobillər – 108,2 bənd
- Yeni avtomobillər – +3,5% artım
- Orta qiymət – 30 480 manat
- Satış aktivliyi indeksi – 110,5 bənd
- Kreditlə satışların payı – 48%
Eyni zamanda orta bazar qiyməti 30 480 manata yüksəlib ki, bu da əvvəlki dövrlərlə müqayisədə artımın davam etdiyini göstərir. Satış aktivliyi də artaraq 110,5 bəndə çatıb.
Vergi dəyişiklikləri bazarı dəyişdi
İqtisadçı Natiq Cəfərli bildirib ki, qiymət artımının əsas səbəbi ilin əvvəlindən tətbiq edilən vergi dəyişiklikləridir:
“Hybrid və elektrik avtomobillərə verilən güzəştlərin ləğvi yeni maşınların qiymətini ən azı 18–20 faiz artırdı”.
Ekspertin sözlərinə görə, bu dəyişiklik alıcı davranışına birbaşa təsir edib. Əvvəllər yeni avtomobilə üstünlük verənlər indi daha çox ikinci əl bazara yönəlir. Bu isə həmin seqmentdə tələbin və nəticədə qiymətlərin artmasına səbəb olub.
Beləliklə, bazarda müşahidə olunan bahalaşma təsadüfi deyil və struktur dəyişikliklərlə bağlıdır. Mövcud tendensiya göstərir ki, yaxın dövrdə avtomobil almaq istəyənlər daha yüksək büdcə ilə hesablaşmalı olacaqlar.
