Oktyabrın 2-də Danimarkanın Kopenhagen şəhərində “Avropa Siyasi Birliyi”nin 7-ci Zirvə toplantısının açılış mərasimi keçirilib. Tədbirdə Azərbaycan Respublikasının Prezidenti İlham Əliyev də iştirak edib.
Xəbərə görə, Danimarkanın Baş naziri Mette Frederiksen Azərbaycan Prezidentini və toplantıda iştirak edən digər dövlət və hökumət başçılarını salamlayıb.
“Avropa Siyasi Birliyi”nin bu Zirvə görüşündə təxminən 50 ölkədən dövlət və hökumət rəhbərləri təmsil olunub. Plenar sessiyalar və ardınca keçirilən dəyirmi masalarda Avropanın ümumi təhlükəsizlik durumu, Rusiya-Ukrayna münaqişəsi, iqtisadi təhlükəsizlik, miqrasiya və həm ənənəvi, həm də hibrit təhdidlərin qarşısının alınması mövzuları müzakirə edilir.
Bu hökumətlərarası platforma siyasi-iqtisadi sahədə əməkdaşlığın gücləndirilməsini, Avropa İttifaqı daxilində və xaricində ölkələr arasında koordinasiyanın inkişafını diqqətdə saxlayır. Birliyin əsas məqsədi Avropa qitəsinin təhlükəsizliyini, sabitliyini və rifahını artırmaq üçün ortaq maraqları əhatə edən məsələlərdə siyasi dialoqun və əməkdaşlığın möhkəmləndirilməsidir.
