Özbəkistanın paytaxtı Daşkənddə keçirilən Mərkəzi Asiya Dövlət Başçılarının 7-ci Məşvərət Görüşündə Azərbaycan tamhüquqlu üzv kimi qəbul olunub. Üzv sayının beşdən altıya yüksəlməsi regionla Azərbaycan arasında möhkəm körpü qurulmasına təkan verir. Özbəkistan Prezidenti Şavkat Mirziyoyev Azərbaycanın qrupda yer almasını ticarət, iqtisadi və mədəni əlaqələrin genişlənməsi baxımından unikal imkan hesab edir. O, birgə inkişaf və dayanıqlı artım üçün vahid regionun formalaşdığını vurğulayıb: “Bu addım regional əlaqələrin möhkəmlənməsi və böyük infrastruktur layihələrinin həyata keçirilməsinə zəmin yaradacaq.”
Mirziyoyev, Çin-Qırğızıstan-Özbəkistan dəmiryol marşrutları, TransAfqan nəqliyyat dəhlizi və Xəzər dənizi əlaqələrinin inkişafının tranzit potensialını artıracağını, Azərbaycanın Avropa ilə iqtisadi inteqrasiyasını dərinləşdirəcəyini qeyd edib. Eyni zamanda, Əfqanıstanın təhlükəsizlik təşəbbüslərinə cəlb edilməsinin də sabitlik yarada biləcəyi bildirilib.
Qazaxıstan Prezidenti Kasım-Jomart Tokayev Azərbaycanı bu formatda qəbul olunması münasibətilə təbrik edərək ölkəmizin regional əməkdaşlığa güclü töhfə verəcəyini bildirib.
Azərbaycanın 7-ci Məşvərət Görüşündə Prezident İlham Əliyev çıxış edərək Orta və Zəngəzur dəhlizlərinin regional və qlobal əhəmiyyətinə diqqət çəkib. Nəqliyyat və logistika infrastrukturunun müasirləşdirilməsi, gömrük sistemlərinin harmonizasiyası və rəqəmsallaşdırılması nəticəsində yükdaşımaların artdığını vurğulayıb. Bu dəhlizlərlə Azərbaycan üzərindən yük daşımaları son üç ildə 90% artıb və yaxın illərdə bu göstəricinin daha da yüksələcəyi gözlənilir.
Azərbaycanın Ələt Beynəlxalq Limanı, Bakı-Tbilisi-Qars dəmir yolu, 9 beynəlxalq hava limanı və regionun ən böyük yük aviaşirkəti kimi infrastruktur layihələri Qafqazda lider mövqeyini təmin edir. Zəngəzur dəhlizinin tamamlanması ilə yeni tranzit imkanlar yaranacaq, bu dəhliz Xəzərin enerji daşıyıcılarının Mərkəzi Asiyaya və regionun karbohidrogen məhsullarının şaxələnməsinə töhfə verəcək.
Bu əməkdaşlıq həmçinin Rəqəmsal İpək Yolu layihəsini, yəni Xəzər dənizinin dibi ilə fiberoptik kabelin çəkilməsini də əhatə edir. Layihə regional ticarətin rəqəmsallaşmasına və sürətli rabitə imkanlarının genişlənməsinə şərait yaradacaq.
Yeni əməkdaşlıq formatları kimi qiymətləndirilən bu təşəbbüslər, “C5+1” və “Mərkəzi Asiya Məşvərət Görüşü +1” modelləri, gələcəkdə Mərkəzi Asiya Birliyi kimi təşkilatlanma üçün bünövrə yaradır və regional ticarət həcminin 1,5-2 dəfə artımını təmin edə bilər.
Ümumilikdə, bu inteqrasiya Azərbaycan və Mərkəzi Asiya dövlətlərinin iqtisadi, mədəni, inzibati və transport sahələrində əməkdaşlığını gücləndirərək regionun dayanıqlı inkişafına xidmət edir.
