Bakı şəhəri Səbail Rayon Məhkəməsində Azərbaycan vətəndaşı Azər Akif oğlu Bağırov barəsində həbs qətimkan tədbirinin seçilməsi ilə bağlı məhkəmə iclası keçirilib.
Daylinews-Az xəbər verir ki, Dövlət Təhlükəsizliyi Xidmətinin (DTX) mətbuat xidmətinin məlumatına əsasən, A. Bağırov xarici xüsusi xidmət orqanlarının nümayəndələrinə kömək etməklə dövlətə xəyanət etməkdə ittiham olunur. O, DTX-nin həyata keçirdiyi tədbirlər nəticəsində İordaniya Haşimilər Krallığı ərazisində saxlanılaraq Azərbaycana gətirilib.
İstintaq materiallarına görə, xarici xüsusi xidmət orqanı, üçüncü ölkələrdə planlaşdırdığı diversiya əməliyyatlarında iştirakını gizlətmək məqsədilə, Azərbaycan vətəndaşı olan Azər Bağırovu öz məqsədləri üçün istifadə edib. A. Bağırov, ölkə vətəndaşı statusundan yararlanaraq xarici xüsusi xidmət orqanının xeyrinə və Azərbaycanın dövlət təhlükəsizliyinə zərər vuracaq casusluq fəaliyyəti ilə məşğul olub.
Məhkəmənin qərarı ilə Azər Akif oğlu Bağırov Azərbaycan Respublikası Cinayət Məcəlləsinin 274-cü maddəsi (dövlətə xəyanət) ilə həbs edilib.
