Azərbaycanda qaz yanacağı ilə işləyən qurğu və avadanlıqların təhlükəsizliyini tənzimləyən ilk texniki reqlament qəbul olunub. Bu barədə Energetika Nazirliyində nazir Pərviz Şahbazovun sədrliyi ilə keçirilən kollegiya iclasında məlumat verilib.
Yeni sənəd qaz avadanlıqlarının təhlükəsizlik standartlarının vahid qaydalar əsasında tətbiqini nəzərdə tutur və ölkədə texniki tənzimləmə sahəsində mühüm addım hesab olunur. Texniki Reqlament Nazirlər Kabinetinin 6 may 2026-cı il tarixli qərarı ilə təsdiqlənib.
Qaz qanununun tətbiqi və yeni elektron sistem müzakirə olunub
Kollegiya iclasında “Qaz təchizatı haqqında” Qanunun icrasından irəli gələn tapşırıqların yerinə yetirilməsi də müzakirə edilib. Bildirilib ki, qanunun tətbiqi çərçivəsində ümumilikdə 11 normativ hüquqi akt layihəsi hazırlanıb və onlardan 9-u artıq təsdiq olunub.
İclas zamanı həmçinin “Azərbaycan Respublikasının enerji balansı” adlı məhdud giriş imkanına malik elektron məlumat bazasının yaradılması istiqamətində görülən işlər barədə təqdimat keçirilib. Qeyd olunub ki, sistem enerji göstəricilərinin real vaxt rejimində izlənməsinə, statistik təhlillərin aparılmasına və qərarların daha operativ qəbul edilməsinə imkan yaradır.
Yeni texniki reqlament qazla işləyən qurğuların təhlükəsizlik tələblərini, uyğunluğun qiymətləndirilməsi prosedurlarını və istehlak bazarına buraxılma qaydalarını müəyyən edir. Sənəd yemək hazırlanması, istilik və isti su təchizatı üçün istifadə olunan qaz avadanlıqları, avtomatik bloklu odluqlar və onlara aid idarəetmə, tənzimləmə və təhlükəsizlik avadanlıqlarını əhatə edir.
Kollegiyanın yekununda müzakirə olunan məsələlərlə bağlı aidiyyəti struktur bölmələrə müvafiq tapşırıqlar verilib. Nazirlik qarşıdakı dövrdə həm normativ bazanın təkmilləşdirilməsi, həm də enerji sektorunda rəqəmsal idarəetmənin genişləndirilməsi istiqamətində işlərin davam etdiriləcəyini bildirib.
