Azərbaycanda su təchizatı infrastrukturunun təkmilləşdirilməsi və genişləndirilməsi üzrə genişmiqyaslı layihənin icrası 15 fevral tarixindən etibarən həyata keçiriləcək.
Bu barədə Dövlət Su Ehtiyatları Agentliyinin sədr müşaviri Etibar Məmmədov “Biznes mühiti və beynəlxalq reytinqlər” Komissiyasının “Su təchizatı şəbəkələrinə qoşulma” işçi qrupunun iclasında məlumat verib.
Müşavir bildirib ki, layihənin həyata keçirilməsi zamanı müəyyən çətinliklər yaransa da, əhəmiyyətli irəliləyiş əldə edilib:
“Biz müxtəlif dövlət qurumları ilə əməkdaşlıq edirik. Müvafiq qurumlar layihənin icrasına cəlb olunub və işlər davam etdirilir”, – deyə Məmmədov qeyd edib.
O, eyni zamanda, Dövlət Şəhərsalma və Arxitektura Komitəsinə təqdim edilən rəsmi sənədlərə daha operativ cavab verilməsinin vacibliyini vurğulayıb:
“16 yanvar tarixindən etibarən müvafiq sənədlər bu quruma təqdim olunub. Artıq bəzi sorğulara cavab alınıb. Yeni qaydalara əsasən, istehlakçıların müraciətlərinə bir ay ərzində cavab verilməli, onların su şəbəkəsinə qoşulması üçün texniki şərtlər təmin edilməlidir ki, bürokratik maneələr yaranmasın”, – deyə o əlavə edib.
