Azərbaycanın iqtisadi inkişafı sabit şəkildə davam edir. Bu barədə iqtisadiyyat naziri Mikayıl Cabbarov 25 noyabr tarixində Milli Məclisdə çıxışı zamanı məlumat verib.
Nazir bildirib ki, 2024-cü ilin yekunları nəzərə alınmaqla, ölkənin real ümumi daxili məhsulu (ÜDM) 2019-2024-cü illər ərzində 14,4 faiz artacaq, qeyri-neft-qaz sektorundakı ÜDM isə 1,3 dəfə yüksələcək.
“2019-cu ildə, COVID-19 pandemiyasından əvvəl, adambaşına düşən ÜDM təxminən 4850 dollar təşkil edirdi. 2024-cü ilin sonunda bu göstəricinin təxminən 7200 dollar səviyyəsinə çatacağı gözlənilir,” – deyə Mikayıl Cabbarov əlavə edib.
Beynəlxalq Valyuta Fondunun oktyabr hesabatına əsasən, dünya iqtisadiyyatının cari və gələn il üzrə artım tempi 3,2 faiz səviyyəsində proqnozlaşdırılır. Azərbaycan isə son illərdə olduğu kimi, bu il də stabil iqtisadi inkişaf göstərir.
