Azərbaycanlı alpinist Vəfa Musayeva yüksək dağçılıq sahəsində unikal uğura imza ataraq üç gün ərzində iki 8 000 metrdən yüksək zirvəni fəth edib.
Daylinews-az.com-un məlumatına görə, Musayeva 8 516 metr hündürlüyə malik Lxotse zirvəsinə uğurla qalxıb. Bu, onun üç gün ərzində ikinci səkkizminliyi fəth etməsi deməkdir.
Əvvəl Everest, sonra Lxotse
İki gün əvvəl Vəfa dünyanın ən yüksək zirvəsi – Everestə (8 848 m) qalxmışdı. O, oradan 7 900–8 000 metr hündürlükdə yerləşən düşərgəyə enmişdi. Qısa fasilədən sonra isə yenidən yüksələrək Lxotse zirvəsini də fəth edib.
Beləliklə, Musayeva 3 gün ərzində iki dəfə 8 min metrdən yuxarı qalxaraq, qeyri-adi fiziki və psixoloji dözümlülük nümayiş etdirib. Hazırda o, Everest düşərgəsindədir və 4 gündən çox bu ekstremal yüksəklikdə qalıb. Bu, insan orqanizmi üçün olduqca ağır sınaqdır — az oksigen və sərt hava şəraiti ciddi təhlükə yaradır.
Musayeva: “Missiya yerinə yetirildi”
Səfərin sonunda Vəfa Musayeva sosial şəbəkədə belə yazıb:
“Missiya yerinə yetirildi. Mən tam təhlükəsiz şəkildə Everestin əsas düşərgəsinə qayıtdım. Təbriklərə görə təşəkkür edirəm. Ümid edirəm, tezliklə evə çatıb tandır çörəyi ilə dovğa yeyəcəyəm.”
Məlumat üçün:
Lxotse — yer kürəsinin dördüncü ən yüksək zirvəsidir və Everestdən cəmi 3 km məsafədə yerləşir. Onun fəthi dünya alpinistləri arasında yüksək nüfuz sayılır.
