Azərbaycanın milli dağ-mədən şirkəti “AzerGold” QSC-nin qızıl və gümüş sikkələri Berlin Dünya Pul (Sikkə) Sərgisində ilk dəfə beynəlxalq miqyasda nümayiş etdirilib. Sikkələr ölkənin tarixi-mədəni irsi və nadir heyvan növlərini əks etdirir. 3 günlük sərgi çərçivəsində 50 ölkədən milli zərbxanalar, mərkəzi banklar daxil olmaqla 320-dən çox iştirakçı məhsullarını təqdim edib.
“AzerGold” stendində Heydər Əliyevin 100 illiyinə həsr edilmiş “Smartminting” texnologiyası ilə 3D “100 il və onun fövqündə bir irs” qızıl sikkəsi, Vətən müharibəsinin 5-ci ildönümünə “Zəfər” sikkəsi, “Qarabağ” kolleksiyası və ölkənin incəsənəti, qədim ənənələrini təbliğ edən digər məhsullar ziyarətçilərə təqdim olunub.
Yeni gümüş kolleksiya diqqəti cəlb etdi
Azərbaycanın gözəl təbiəti, nadir növlərin qorunması və müasir istehsal texnologiyalarını birləşdirən yeni nəsil gümüş sikkə kolleksiyası sərgi qonaqlarının marağını cəlb edib.
Sərgidə Avropa şirkətləri ilə tərəfdaşlıq müzakirələri aparılıb. “Qızıl və gümüş məhsulların Satış və Mübadilə Mərkəzi”ndə 200 ədədlik limitli nəşrlərlə təqdim olunan sikkələr həm kolleksioner, həm investisiya üçün uyğundur.
Sərgi 1972-ci ildə Bazelda başlayıb, 2006-cı ildən Berlin World Money Fair adlanır və qlobal numizmatika aləmini birləşdirən nüfuzlu tədbirdir.
