Rusiya ilə Ukrayna arasında davam edən silahlı qarşıdurmada iştirak etmiş bir qrup Azərbaycan vətəndaşı barəsində cinayət təqibi başlanılıb. Məlumat Dövlət Təhlükəsizliyi Xidməti tərəfindən yayılıb.
DTX bildirir ki, Azərbaycan qanunvericiliyində nəzərdə tutulmayan silahlı birləşmələrin tərkibində ölkə hüdudlarından kənarda döyüş əməliyyatlarında iştirak edən vətəndaşların müəyyən edilməsi və onların məsuliyyətə cəlb olunması istiqamətində əməliyyat-istintaq tədbirləri davam etdirilir.
Araşdırmalara əsasən, Rusiya-Ukrayna müharibəsində xeyli sayda azərbaycanlının döyüşdüyü, onlardan bir qisminin həlak olduğu, itkin düşdüyü, yaralandığı, bəzilərinin isə əsir götürüldüyü rəsmən qeydə alınıb.
Həbs edilənlərin adları və seçilən qətimkan tədbiri
İstintaqla aydınlaşdırılıb ki, Azərbaycan vətəndaşları – 1991-ci il təvəllüdlü Nəbiyev Real Eldəniz oğlu, 1993-cü il təvəllüdlü Hüseynov Faris Famil oğlu, 1994-cü il təvəllüdlü Məmmədov Ali Elnur oğlu və Mirhəşimli Murov Həsən oğlu Rusiya və Ukraynanın müxtəlif silahlı birləşmələrinin nəzarəti altında aparılan döyüşlərdə bilavasitə iştirak ediblər.
Bu faktlar sübuta yetirildikdən sonra həmin şəxslər 2026-cı ilin yanvarında saxlanılıb və barələrində məhkəmənin qərarı ilə həbs qətimkan tədbiri seçilib.
Rəsmi qurum bir daha vətəndaşlara xatırladır ki, xarici ölkələrdə qanunvericiliklə təsbit olunmamış silahlı dəstələrin tərkibində hərbi münaqişələrə qoşulmaq Azərbaycan Respublikasının Cinayət Məcəlləsinə görə ağır və bir sıra hallarda xüsusilə ağır cinayət hesab olunur.
Bildirilir ki, gələcəkdə də belə əməllərə yol verən şəxslər barəsində hüquqi məsuliyyət labüddür və bu istiqamətdə tədbirlər qətiyyətlə davam etdiriləcək.
