San-Fransiskoda keçirilən Super Bowl-un fasilə şousunda Bad Bunny-nin möhtəşəm çıxışı dünya üzrə dərhal dinlənmə artımına səbəb olub.
Apple Music-in açıqladığı yeni statistikalar göstərir ki, Puertorikolu ulduzun musiqisi çıxışdan sonra bir neçə saat ərzində həm çartlarda, həm də musiqi axtarış platformalarında kəskin yüksəlişə nail olub.
Apple Music-də rekord göstəricilər
Super Bowl fasilə şousunun rəsmi sponsoru olan Apple Music bildirib ki, Bad Bunny üçün tərtib edilən xüsusi pleylist qısa müddətdə platformanın ən çox dinlənilən set-listi olub.
İfaçının populyarlığı qlobal çartlara da ciddi təsir göstərib — o, Apple Music Global Daily Top 100 siyahısında 23 mahnı ilə yer alıb, onlardan 9-u ilk 25-liyə, 5-i isə ilk 10-luğa daxil olub. “DtMF” isə dünya üzrə birinci yerə yüksəlib.
Çarta yenidən daxil olan mahnılar arasında diqqət çəkən nümunələr var. 23 mahnıdan altısı 2025-ci ilin fevralından bəri ilk dəfə Top-100-də görünüb. Onun Cardi B və J Balvin ilə ifa etdiyi “I Like It” hitinin isə 2020-ci ilin yanvarından sonra ilk dəfə siyahıya qayıtması xüsusi maraq doğurub.
Bad Bunny-nin son albomu “Debí Tirar Más Fotos” da global miqyasda geniş dinləmə əldə edib. Albom 155 ölkədə çartlara daxil olub, onların 128-də Top-10, 46 ölkədə isə birinci yer olub. Siyahıda Meksika, Kolumbiya, Braziliya, Almaniya, Fransa və İspaniya kimi böyük bazarlar yer alır.
Shazam göstəriciləri də rekord qırdı
Musiqi tanıma platforması Shazam da analoji yüksəliş qeydə alıb. Apple Music-in məlumatına görə, Bad Bunny-nin çıxışı Shazam tarixində lationamerikalı və qeyri-ingilis dilli ifaçı üçün ən böyük gündəlik artım olub.
Onun mahnılarının axtarışı fasilə şousu zamanı və dərhal sonra adi günlərlə müqayisədə 400 faizdən çox artıb. Ən çox Shazam edilən parçalar arasında Lady Gaga ilə duet “Die with a Smile” və Ricky Martinlə “Lo Que Le Pasó a Hawaii” xüsusi seçilib.
ABŞ-da dinlənmə xəritəsi
Apple Music-in məlumatına əsasən, çıxışdan sonrakı altı gün ərzində Bad Bunny-nin ən çox dinlənildiyi ABŞ şəhərləri bunlar olub:
- Los-Anceles
- Nyu-York
- Çikaqo
- Dallas
Apple Music və Beats-in vitse-prezidenti Oliver Şüsser Bad Bunny-nin yüksəlişini belə şərh edib: “Biz 2016-cı ildən bəri Bad Bunny ilə işləməkdən böyük məmnunluq duyuruq. Onun dünya səviyyəli superulduza çevrilməsi həm inanılmaz, həm də tamamilə təbiidir. Apple Music-də onun fanatlarının fəallığı bu rəqəmlərdə öz əksini tapır və onun musiqi mədəniyyətinə təsirinin necə böyük olduğunu göstərir”.
