Heydər Əliyev adına Beynəlxalq Hava Limanında noyabrın 5-dən başlayaraq “Qarabağın Dirçəlişi: Azərbaycan İntibahının Hekayəsi” adlı fotosərgi açılıb. Sərgi Qarabağ Dirçəliş Fondunun təşkilatçılığı ilə, “Azərbaycan Hava Yolları” QSC-nin dəstəyi sayəsində həyata keçirilib.
25 təsirli fotodan ibarət sərgi hava limanının 1-ci Terminalında, “Duty Free” (beynəlxalq gediş) və baqaj alınma (beynəlxalq gəliş) zonalarında təşkil olunub və noyabrın 12-dək davam edəcək. Böyük Britaniyalı yazıçı Qrem Vilsonun eyniadlı kitabından seçilmiş fotolar əsasında hazırlanmış bu sərgi işğaldan azad edilmiş Qarabağ ərazilərində aparılan genişmiqyaslı bərpa və quruculuq işlərini əks etdirir.
Təqdim olunan şəkillər Prezident İlham Əliyevin rəhbərliyi ilə həyata keçirilən layihələri, həmçinin tarixi-mədəni irsin bərpasını, sosial infrastrukturun inkişafını və Qarabağın zəngin təbiətini nümayiş etdirir. Sərgi artıq Bakıda ticarət mərkəzləri və digər məkanda da maraqla qarşılanacaq.
Qarabağ Dirçəliş Fondu yaranandan bəri ərazilərimizin bərpası ilə bağlı həqiqətlərin yayılması və maarifləndirmə işləri aparır, bu sərgi də həmin məqsədlərə xidmət edən mühüm layihə kimi diqqət çəkir.
