“Formula-1” Azərbaycan Qran-Prisi 2026-ya hazırlıq çərçivəsində paddok ərazisinin qurulmasına başlanılıb. Bu barədə Bakı Şəhər Halqası Əməliyyat Şirkəti (Baku City Circuit Operating Company) məlumat yayıb.
Bildirilib ki, yarış həftəsinə hazırlıq işləri plan üzrə davam edir və paddok ənənəvi olaraq Neftçilər prospektində, Hökumət Evinin qarşısında təşkil olunur. Müvəqqəti infrastrukturun quraşdırılması ilə əlaqədar ərazidə hərəkət intensivliyi arta bilər.
Sakinlərə və sürücülərə müraciət
Şirkət paytaxt sakinlərini və sürücüləri diqqətli olmağa çağırıb. Rəsmi açıqlamada qeyd olunub ki, təhlükəsizlik və rahatlıq üçün bütün zəruri tədbirlər görülür və şəhər sakinlərinə anlayış göstərdiklərinə görə təşəkkür edilib.
“Formula-1” Azərbaycan Qran-Prisi 2026 sentyabrın 24-dən 26-dək Bakıda keçiriləcək. Şəhər halqası trası artıq ənənəvi olaraq təqvimdə ən maraqlı mərhələlərdən biri hesab olunur.
Yarış həftəsonu ərzində on minlərlə xarici və yerli azarkeşin Bakıya gələcəyi gözlənilir. Qran-pri çərçivəsində həm əsas yarış, həm də müşayiətedici tədbirlər paytaxtın mərkəzində təşkil ediləcək. Bakı növbəti dəfə dünya avtoidmanının diqqət mərkəzinə çevriləcək.
