Paytaxtda yerləşən özəl “MayoMed” tibb müəssisəsində həkimlik ixtisası olmayan şəxsin kosmetoloji xidmətlər göstərməsi ciddi qalmaqala səbəb olub. Məsələ ilə bağlı Səhiyyə Nazirliyinin Analitik Ekspertiza Mərkəzinə (AEM) vətəndaş müraciət edib və bunun əsasında araşdırma aparılıb.
Araşdırmanın nəticəsi: cərimə və hüquqi prosedurlar
AEM-in mətbuat xidmətindən verilən məlumata görə, araşdırma zamanı Nihad Aslanov adlı şəxsin tibbi təhsil olmadan klinikada fəaliyyət göstərdiyi müəyyən edilib. Bununla əlaqədar İnzibati Xətalar Məcəlləsinin müvafiq maddələri əsasında protokollar tərtib olunub və klinikaya cərimə tətbiq edilib.
Məlumatda qeyd edilir ki, klinika rəhbərliyi daha sonra rəsmi şəkildə Nihad Aslanovun müəssisə ilə əmək münasibətlərində olmadığını bildirib: “Paylaşılan videomateriallardakı qanun pozuntuları ilə bağlı Nihad Aslanov barəsində hüquq-mühafizə orqanlarına müraciət ediləcək.”
Nihad Aslanovun fəaliyyəti əvvəl də dayandırılmışdı
Təxminən iki ay əvvəl də AEM bu klinikada yoxlama aparmış və Nihad Aslanovun qeyri-qanuni fəaliyyətini dayandırmışdı. Lakin son zamanlar onun yenidən pasiyent qəbul etdiyinə dair məlumatlar yayılıb.
Baku TV-nin əməkdaşı klinikaya baş çəkərək məsələni araşdırıb. Klinika nümayəndəsi Nihad Aslanovun artıq burada çalışmadığını bildirib: “Nihad bəy 4-5 ay əvvəl işdən çıxıb. Hal-hazırda bizim kollektivdə belə bir əməkdaş yoxdur.”
Səhiyyə Nazirliyi: adı lisenziyalı plastik cərrahlar arasında yoxdur
Səhiyyə Nazirliyindən bildirilib ki, plastik cərrah ixtisası üzrə rəsmi fəaliyyət göstərməyə icazəsi olan həkimlər siyahısında Nihad Aslanovun adı yoxdur: “2023-cü ildə klinikada planlı yoxlama aparılıb, müəssisəyə inzibati məsuliyyət tətbiq olunub, həkimin fəaliyyəti dayandırılıb. Həmin vaxtdan bəri onun fəaliyyəti ilə bağlı quruma yeni məlumat daxil olmayıb.”
