Bakı şəhərində Özbəkistan parkının, Daşkənddə isə Azərbaycan parkının inşa edilməsi nəzərdə tutulur.
Bu barədə məlumatı İxracın və İnvestisiyaların Təşviqi Agentliyi – AZPROMO-nun icraçı direktoru Yusif Abdullayev IV Daşkənd Beynəlxalq İnvestisiya Forumu çərçivəsində keçirilən “Azərbaycan – Özbəkistan: İqtisadi tərəfdaşlığın vektoru” adlı panel sessiyası zamanı açıqlayıb.
Onun sözlərinə görə, bu təşəbbüs Azərbaycanla Özbəkistan arasında dostluğun və qarşılıqlı hörmətin rəmzinə çevriləcək:
“Bu parklar xalqlarımız arasında dostluğun və qarşılıqlı hörmətin simvoluna çevriləcək. İyunun əvvəlində Daşkəndin meri, eyni zamanda, mənim yaxın dostum Şavkat Umurzakov Bakıda işgüzar səfərdə idi. Səfər çərçivəsində paytaxtın Ağ şəhər ərazisində Özbəkistan parkının inşa ediləcəyi əraziyə baxış keçirildi. Buna cavab olaraq, bu ayın sonunda Azərbaycan nümayəndə heyətinin Daşkəndə səfəri planlaşdırılır. Həmin səfər zamanı da Azərbaycan parkının salınacağı əraziyə baxış keçiriləcək. Bu, iki paytaxt arasında canlı mədəni körpü olacaq”.
Beləliklə, qarşılıqlı olaraq hər iki ölkənin paytaxtında milli mədəniyyətləri təcəssüm etdirən parkların yaradılması planlaşdırılır. Bu addım təkcə şəhərsalma baxımından deyil, eyni zamanda ikitərəfli əlaqələrin inkişafında da mühüm rol oynayacaq.
