Estoniya millisinin üzvü Maksim Paskoçi Millətlər Liqasının 5-ci turunda Azərbaycan millisinə qarşı keçiriləcək matç öncəsi keçirilən mətbuat konfransında oyun haqqında fikirlərini bölüşüb. O, komandasının oyuna tam hazır olduğunu vurğulayıb və qalib gəlmək niyyətində olduqlarını bildirib. “Bura qələbə qazanmaq üçün gəlmişik. Komanda olaraq oyuna hazırıq. Ümid edirəm ki, sabah istədiyimiz nəticəni əldə edəcəyik”, – deyə Paskoçi qeyd edib.
Futbolçu jurnalistlərin suallarını cavablandırarkən Qəbələdə oynamağın təsirləri ilə bağlı bunları deyib: “Bizə lazım olan sadəcə futbol meydançası və topdur. Bunun bizə təsir edəcəyini düşünmürəm”. Azərbaycan millisindən hansısa oyunçunu tanıyıb-tanımadığı sualına isə belə cavab verib: “Mən üzərimə düşəni etmişəm, rəqibin hücumçularını təhlil etmişəm. Bundan daha önəmli olan komanda olaraq düzgün müdafiə olunmağımızdır”.
