Martın 19-da Birləşmiş Millətlər Təşkilatının (BMT) Ümumdünya Meteorologiya Təşkilatı (ÜMT) illik qlobal iqlim hesabatını yayımladı.
Mütəxəssislərin araşdırmasına görə, 2024-cü il meteomüşahidələrin aparıldığı son 175 il ərzində ən isti il olub. Bundan əlavə, ilk dəfə olaraq dünya üzrə orta temperatur sənaye inqilabından əvvəlki dövrü (1900-cü ildən əvvəl) 1,5°C-dən çox üstələyib.
Hesabatda həmçinin qeyd edilir ki, son səkkiz il ərzində dünya okeanlarının istilik miqdarı ardıcıl rekord göstəricilərə çatıb. Həmçinin, müşahidələrin aparıldığı son 18 il ərzində Arktik dəniz buzunun ən kiçik sahəyə malik olduğu bütün illər məhz bu dövrə təsadüf edib.
Qlobal istiləşmənin fəsadları
Artan temperatur planetdə bir sıra fəlakətlərin sürətlənməsinə səbəb olur:
- Qütb buzlaqlarının əriməsi və dəniz səviyyəsinin qalxması
- Daha çox və daha güclü qasırğalar, tufanlar və sunamilər
- Antarktidada son üç ildə rekord səviyyədə buz itkisi
- Dünyada quraqlıq və daşqınların sayının artması
BMT-nin Baş katibi Antonio Quterreş mövcud vəziyyətin ciddiliyinə diqqət çəkərək bildirib: “Planetimiz getdikcə daha çox həyəcan siqnalları göndərir.” O əlavə edib ki, dəniz səviyyəsinin artım sürəti peyk müşahidələrinin başlanğıcından bəri iki dəfə artıb.
İnsanlığa təsiri
BMT-nin hesabatında qeyd olunur ki, 2024-cü ildə tropik qasırğalar, daşqınlar, quraqlıqlar və digər təbii fəlakətlər:
- Son 16 ilin ən yüksək məcburi miqrasiya göstəricilərinə səbəb olub
- Qlobal ərzaq böhranını daha da ağırlaşdırıb
- İqtisadi itkiləri misilsiz səviyyəyə çatdırıb
İqlim dəyişikliyi ilə bağlı bu narahatedici göstəricilər, qlobal miqyasda təcili tədbirlərin görülməsinin vacibliyini bir daha vurğulayır.
