Bakıda keçirilən ənənəvi “Böyük İpək Yolu” beynəlxalq boks turnirində qızıl medal qazanan Azərbaycan idmançıları artıq növbəti məqsədlərini müəyyənləşdiriblər. 55 kq çəki dərəcəsində qalib olan Amin Məmmədzadə və 50 kq-da çempionluq yaşayan Sübhan Məmmədov daha nüfuzlu yarışlarda da uğurlu çıxış etməyə kökləndiklərini bildiriblər.
Hər iki boksçu turnirdə göstərdikləri performansı gələcək startlar üçün mühüm addım kimi qiymətləndirir və beynəlxalq arenada ölkəni layiqincə təmsil etmək niyyətindədir.
Amin Məmmədzadə yarışa yüksək səviyyədə hazırlaşdığını və nəticəyə əvvəlcədən inandığını qeyd edib. Onun sözlərinə görə, turnirdə keçirdiyi bütün görüşlər plan üzrə gedib:
“Bu turnirə ciddi hazırlaşmışdım və qalib olacağıma inanırdım. Üç döyüşdə üstünlük qazandım və qızıl medal əldə etdim. Növbəti məqsədim böyüklər arasında Avropa çempionatında iştirak etməkdir. Orada da medal qazanmaq və bayrağımızı yüksəltmək istəyirəm”.
Sübhan Məmmədov da komanda yoldaşı kimi hazırlığın yüksək səviyyədə təşkil olunduğunu vurğulayıb. O, turnirdə bütün rəqiblərinə qalib gəldiyini və artıq ikinci dəfə bu yarışın qalibi olduğunu xatırladıb:
“Hər üç görüşdə qalib gəlməyi bacardım. Bu, mənim üçün böyük sevincdir. Bu turnirdə ikinci dəfə çempion oluram. Qarşıda Braziliyada keçiriləcək Dünya Kuboku var və istəyirəm ki, bu nəticəni orada da təkrarlayım”.
Turnirin yekun nəticələrinə əsasən, Azərbaycan milli komandası ümumilikdə 21 medal qazanaraq komanda hesabında birinci yeri tutub. Yığmanın nəticələri belə olub:
- 6 qızıl medal
- 5 gümüş medal
- 10 bürünc medal
Bu göstərici ilə Azərbaycan komandası “Böyük İpək Yolu” kubokuna sahib çıxıb. İkinci yeri Qazaxıstan (3 qızıl, 5 gümüş, 7 bürünc), üçüncü yeri isə Türkiyə (3 qızıl, 0 gümüş, 3 bürünc) tutub.
Bakıda keçirilən yarış bir daha göstərdi ki, Azərbaycan boksu həm fərdi, həm də komanda nəticələri baxımından yüksək səviyyədə inkişaf edir və idmançılar beynəlxalq arenada uğurlarını davam etdirmək niyyətindədirlər.
