Amerikalı milyarder, Amazon şirkətinin qurucusu Ceff Bezos və telejurnalist Loren Sançes uzun illərin münasibətindən sonra 27 iyun tarixində rəsmi nikaha daxil oldular. Toy mərasimi İtaliyanın Venesiya şəhərində, San-Corco-Madcore adasında, açıq hava şəraitində baş tutdu və tədbirə təxminən 200 nəfər dəvət olunmuşdu.
Romantik musiqi və ulduz dolu qonaqlar
Toyun başlanğıcı Elvis Preslinin “Can’t Help Falling in Love” mahnısının ifası ilə yadda qaldı. Mahnını məşhur italyan tenor Matteo Bocelli səsləndirdi. Mərasimin təsirli anlarını Loren Sançes öz Instagram hesabında paylaşdı.
Toyda təxminən 70 nəfər ailə üzvü, digər 130 nəfər isə məşhurlar və yaxın dostlar iştirak edib. Qonaqlar arasında Leonardo Di Kaprio, Kardashian ailəsinin üzvləri (Kim, Kris və Kayli), İvanka Tramp və Cared Kuşner, Opra Uinfri, Orlando Blum, Tom Bredi, Süni Svini, Diana fon Fyürstenberq və Bill Qeyts kimi tanınmış simalar yer alıb.
Gəlin və bəyin geyimi
Ceff Bezos klassik, zərif üslubda – ağ köynək, qara smokin və kəpənək qalstukda görüntüləndi. Onun geyimi sadə, lakin yüksək zövqlü detallarla seçilirdi.
Loren Sançes isə Dolce & Gabbana brendindən xüsusi dizayn edilmiş dantel detallı, dar siluetli və uzun şlefi olan gəlinlikdə gəlinliyə gəldi. Vogue jurnalına əsasən, gəlinliyin yüksək yaxalığı və vintage elementləri tədbirə fərqli cazibə qatıb.
Hədiyyə əvəzinə xeyriyyə
Əvvəlcədən planlaşdırıldığı kimi toy 28 iyuna təyin olunmuşdu, lakin Venesiyada mümkün etiraz aksiyalarına görə tarix bir gün qabağa çəkilib.
Buna baxmayaraq, cütlük yerli ictimaiyyətə təşəkkürünü bildirib – tədbirdə istifadə olunan məhsulların 80%-dən çoxunu Venesiyada alıblar. Üstəlik, qonaqlardan hədiyyə gətirməməyi, əvəzində Venesiyadakı xeyriyyə təşkilatlarına ianə etməyi xahiş ediblər.
Bu toy niyə “əsrin toyu” sayılır?
- Mərasimin ümumi xərci 50 milyon avro olaraq qiymətləndirilir.
- Tədbir üç gün davam edəcək.
- Bütün qonaqlar üçün 90-a yaxın şəxsi təyyarə və yaxtalar Venesiyada gözlənilir.
Cütlük haqqında
61 yaşlı Bezos dünyanın ən varlı insanlarından biri sayılır – Forbesa görə onun sərvəti 227 milyard dollar təşkil edir. Bu, hər iki tərəf üçün ikinci evlilik olub. Onlar 2023-cü ilin mayında nişanlanıblar.
