Fransa Prezidenti Emmanuel Makron, ölkənin yeni baş naziri vəzifəsinə Fransua Bayrunu təyin edib. Bu barədə Elysee Sarayı məlumat yayıb.
Fransua Bayru, Makronun tərəfdarı olmaqla yanaşı, həm də “Demokratik Hərəkat” partiyasının lideridir. Yeni baş nazirin əsas vəzifəsi, parlamentdə yaranmış siyasi parçalanmaya baxmayaraq, hökuməti formalaşdırmaqdır.
Bu təyinat, əvvəlki baş nazir Miçel Barniyenin yalnız üç ay vəzifədə qaldıqdan sonra, 5 dekabrda istefa verməsindən sonra baş tutub. İstefanın səbəbi parlamentin Barniyenin qərarlarına qarşı çıxaraq hökumətə etimadsızlıq votumu qəbul etməsi olub.
CNN-in məlumatına görə, Bayruya bölünmüş parlamentdə 2025-ci il büdcəsini təsdiqlətmək kimi çətin bir vəzifə tapşırılıb. Parlamentdə həm sol, həm də sağ qanad fraksiyaları Prezident Makronun siyasətinə açıq-aşkar müxalifət göstərir. Bayrunun bu siyasi maneələri necə dəf edəcəyi diqqətlə izlənəcək.
