İnternet istifadəçilərinin əksəriyyəti gündəlik olaraq Google Chrome brauzerindən istifadə edir. Lakin zaman keçdikcə brauzerin işləmə sürətində azalma, saytların gec açılması və ya səhv görüntülənməsi kimi problemlər yarana bilər. Bu halların əsas səbəblərindən biri keş fayllarının yığılmasıdır. Keşi təmizləmək isə bu problemləri aradan qaldırmağın ən sadə və effektiv yollarından biridir.
Keş nədir və niyə vacibdir?
Google Chrome-da hər hansı bir saytı ilk dəfə açdığınız zaman brauzer həmin səhifənin düzgün işləməsi üçün lazım olan məlumatları – şəkilləri, skriptləri və digər elementləri yükləyir. Əgər sayt çoxlu qrafik və ya ağır elementlərdən ibarətdirsə, bu proses bir qədər vaxt apara bilər. Xüsusilə internet sürəti zəifdirsə, ilk yüklənmə daha ləng hiss olunur.
Məhz bu səbəbdən Chrome bəzi məlumatları yadda saxlayır. Bu məlumatlar “keş” adlanır və növbəti dəfə eyni sayta daxil olduqda həmin elementləri yenidən yükləməyə ehtiyac qalmır. Bu da saytların daha sürətli açılmasına kömək edir.
Lakin zaman keçdikcə keşdə saxlanılan fayllar çoxalır, köhnəlir və ya bəzən zədələnir. Nəticədə brauzerin performansı zəifləyə, səhifələr düzgün yüklənməyə bilər. Buna görə də keşin vaxtaşırı təmizlənməsi tövsiyə olunur.
Kompüterdə Google Chrome keşini necə silmək olar?
Kompüter istifadəçiləri üçün keşin təmizlənməsi olduqca asandır. Bunun üçün aşağıdakı addımları yerinə yetirmək kifayətdir:
- Brauzerin sağ yuxarı küncündə yerləşən üç nöqtəyə klik edin
- Açılan menyudan “Parametrlər” bölməsinə daxil olun
- “Məxfilik və təhlükəsizlik” bölməsini seçin
- “Brauzer məlumatları” hissəsinə keçin və “Cihazdan sil” seçimini klikləyin
Açılan pəncərədə hansı məlumatların silinəcəyini seçə bilərsiniz. Buraya cookie faylları, keşdə saxlanılan şəkillər və brauzer tarixçəsi daxildir. Eyni zamanda silmə intervalını da müəyyən etmək mümkündür – son bir saatdan başlayaraq bütün müddəti əhatə edən variantlara qədər seçim təqdim olunur.
Mac istifadəçiləri üçün də proses eyni qaydada həyata keçirilir və menyu vasitəsilə bu funksiyaya tez daxil olmaq mümkündür.
Smartfonlarda keşin təmizlənməsi
Mobil cihazlarda da Google Chrome keşini silmək olduqca sadədir. Android əməliyyat sistemində aşağıdakı addımları izləmək kifayətdir:
- Chrome tətbiqini açın
- Menyu düyməsinə daxil olun
- “Parametrlər” bölməsinə keçin
- “Məxfilik və təhlükəsizlik” hissəsini seçin
- “Məlumatları təmizlə” funksiyasını aktiv edin
iPhone və digər iOS cihazlarında isə proses demək olar ki, eynidir. Yeganə fərq menyunun ekranın aşağı hissəsində yerləşməsidir.
Bundan əlavə, Android istifadəçiləri üçün alternativ bir üsul da mövcuddur. Sistem parametrlərinə daxil olaraq tətbiqlər siyahısından Chrome-u seçmək, daha sonra yaddaş bölməsinə keçərək “Keşi təmizlə” düyməsinə basmaq mümkündür. Bu üsul yalnız müvəqqəti faylları silir və digər məlumatlara toxunmur.
Keşi nə vaxt təmizləmək lazımdır?
Mütəxəssislər bildirirlər ki, keşin tez-tez silinməsi vacib deyil. Lakin müəyyən hallarda bu addım olduqca faydalı olur. Məsələn:
- Brauzer əvvəlkindən daha yavaş işləyirsə
- Saytlar düzgün açılmırsa və ya səhvlər yaranırsa
- Köhnə məlumatlar səbəbindən səhifələr yenilənmirsə
Bu kimi hallarda keşin təmizlənməsi problemi aradan qaldıra bilər. Eyni zamanda ayda bir dəfə profilaktik olaraq bu əməliyyatı həyata keçirmək brauzerin stabil işləməsinə kömək edir.
Google Chrome keşinin təmizlənməsi sadə görünsə də, brauzerin performansına ciddi təsir göstərən vacib addımdır. Müntəzəm olaraq bu əməliyyatı yerinə yetirməklə həm səhifələrin daha sürətli açılmasını təmin etmək, həm də müxtəlif texniki problemlərin qarşısını almaq mümkündür. Bu üsul brauzeri “yeniləmək” və daha rahat istifadə təcrübəsi əldə etmək üçün ən praktik həll yollarından biri hesab olunur.
