Bu gün Azərbaycan musiqi mədəniyyətində silinməz iz qoymuş tanınmış bəstəkar, Əməkdar incəsənət xadimi Qəmbər Hüseynlinin doğum günüdür. Onun yaradıcılığı milli musiqi tarixində xüsusi yer tutur və bu gün də sevgi ilə xatırlanır.
Qəmbər Hüseynli 1916-cı il aprelin 16-da Gəncə şəhərində, sadə zəhmətkeş ailəsində dünyaya gəlib. Atası dəmirçi olub və ailənin zəhmət mühiti onun xarakterinin formalaşmasında mühüm rol oynayıb. Erkən yaşlarından musiqiyə maraq göstərən gələcək bəstəkar ilk təhsilini Gəncədə alıb.
Yaradıcılıq yolunun başlanğıcı
Gənc yaşlarında musiqi təhsilinə başlayan Hüseynli əvvəlcə tar sinfi üzrə ixtisaslaşıb. Daha sonra pedaqoji texnikumda təhsilini davam etdirib və burada göstərdiyi uğurlu nəticələr sayəsində müəllimlərin qərarı ilə Bakıya göndərilib.
Onun ilk yaradıcılıq nümunələrindən biri olan “Tellər oynadı” romansı Cəfər Cabbarlının sözlərinə bəstələnib. Bu əsər gənc bəstəkarın istedadını üzə çıxararaq onun gələcək uğurlarının başlanğıcı kimi qiymətləndirilir.
Qəmbər Hüseynlinin yaradıcılığında mahnı və romanslar xüsusi yer tutur. “Ay işığında”, “Gecələr uzanaydı”, “Düşür yadıma”, “Gülə-gülə”, “Sən-sən” kimi əsərlər onun musiqi irsinin ən parlaq nümunələri hesab olunur və bu gün də dinləyicilər tərəfindən sevilir.
“Cücələrim” – dünyaya yayılan melodiya
Bəstəkarın ən məşhur əsərlərindən biri isə 1948-ci ildə şair Tofiq Mütəllibov ilə birgə yaratdığı “Cücələrim” mahnısıdır. Bu əsər qısa müddətdə böyük populyarlıq qazanaraq Azərbaycan musiqisinin simvollarından birinə çevrilib.
Mahnı sonradan dünyanın 100-dən çox dilinə tərcümə olunaraq beynəlxalq səviyyədə tanınıb. Hətta məşhur kino ustası Charlie Chaplin bir dəfə Azərbaycan nümayəndələri ilə görüş zamanı bu melodiyanı pianoda ifa edərək belə demişdi: “Siz bu musiqinin vətənindən gəlmisiniz? O xoşbəxt bəstəkara mənim salamımı çatdırın!”
Qəmbər Hüseynli 1961-ci il avqustun 1-də vəfat edib. Qısa ömrünə baxmayaraq, o, Azərbaycan musiqisinə dəyərli irs bəxş edib və adı bu gün də böyük ehtiramla yad olunur.
