Rusiya Elmlər Akademiyasının Kosmik Tədqiqatlar İnstitutunun Günəş astronomiyası laboratoriyası və Günəş-Yer fizikası institutunun alimləri Günəşin aktivliyində ciddi artım qeydə alındığını açıqlayıblar.
Son bir neçə gün ərzində Günəşdə 50-dən çox partlayış baş verib. Onlardan biri ən yüksək X sinifinə, 11-i isə orta M sinifinə aiddir. 28 mart tarixində baş vermiş X-sinifli partlayış plazma tullantısı ilə müşayiət olunsa da, onun trayektoriyası Yer üçün təhlükəli olmayıb və planetimizi yan keçib.
Tədqiqatçıların bildirdiyinə görə, partlayışların artması təsadüfi deyil və sistemli xarakter daşıyır. Həm şimal, həm də cənub yarımkürəsində bir neçə aktiv zonada eyni anda partlayışlar müşahidə olunub. Onların arasında ən güclüsü – №4048 sahəsi – artıq Günəş-Yer xəttinə yaxınlaşır və sabahdan etibarən Yerə təsir etməyə başlaya bilər.
Hazırda Günəş küləyi zəifdir və maqnit qasırğaları ilə bağlı konkret proqnozlar verilməyib. Lakin №4048 aktiv zonasının daha da yaxınlaşması ilə, Yerin maqnit sahəsinə mümkün təsirlərlə bağlı daha dəqiq qiymətləndirmələr veriləcək.
