Paytaxt bazarlarında mövsümündən əvvəl satışa çıxarılan istixana meyvələri alıcıların diqqətini cəlb etsə də, onların keyfiyyəti və qiyməti ciddi narazılıq doğurur.
Piştaxtalarda rəngarəng görünüşü ilə seçilən çiyələk, ərik və digər məhsulların dadı isə çox vaxt gözləntiləri doğrultmur. Satıcılar məhsulu yüksək keyfiyyətli kimi təqdim etsələr də, alıcıların təcrübəsi bunun əksini göstərir.
Satış zamanı bəzi satıcılar meyvələrin təbii və dadlı olduğunu iddia edir:
“Bu çiyələk köhnə sortdur, çox ləzzətlidir, rahatlıqla ala bilərsiniz”, – deyə onlar alıcıları inandırmağa çalışırlar. Digər hallarda isə kiçik ölçülü meyvələrin “dərmanlı” olduğu iddiası ilə daha iri məhsullar ön plana çıxarılır.
Qiymət və keyfiyyət problemi alıcıları narahat edir
Alıcıların sözlərinə görə isə reallıq fərqlidir. Bəziləri meyvələrin üzərindəki ləkələrə görə tərəddüd etdiyini bildirir:
“Pul verib alıram, amma görünüşü belə məni şübhələndirir”, – deyə alıcılardan biri qeyd edir.
Digər problem isə qiymətlərin şəffaf olmamasıdır. Bir çox piştaxtada məhsulun qiyməti göstərilmir və bu da alıcı ilə satıcı arasında narazılığa səbəb olur. Qiyməti soruşan alıcıların bəziləri yüksək məbləği eşidəndən sonra alışdan imtina edir.
Alıcıların sözlərinə görə, erkən mövsümdə satışa çıxarılan meyvələrin dadı da qənaətbəxş deyil:
“Çiyələk var, amma dadı hiss olunmur. Digər meyvələr də hələ tam yetişməyib”, – deyə şikayətlər səslənir.
Xüsusilə pensiya ilə dolanan vətəndaşlar üçün qiymətlər əlavə çətinlik yaradır. Onların sözlərinə görə, bəzi məhsulların qiyməti ikiqat yüksəkdir və bu səbəbdən istədiklərini almaq mümkün olmur.
