Portuqaliya millisinin kapitanı Kriştianu Ronaldu, Danimarka ilə keçiriləcək qarşılaşma öncəsi mətbuat konfransında jurnalistlə sərt sözlərlə mübahisəyə girib. Ulduz futbolçu jurnalistlərin verdiyi suallardan və onların tonundan narazı qaldığını bildirib.
Ronaldu: “Bizi əhatə edən bu qədər neqativlik nəyə görədir?”
Ronaldu çıxışında qeyd edib ki, son günlərdə milli komanda ətrafında yaranmış atmosfer onu narahat edir:
“Hiss edirəm ki, milli komandanın ətrafında çoxlu neqativlik var. Son günlərdə bir neçə mətbuat konfransına baxdım və orada gördüklərim xoşuma gəlmədi. Açığını desəm, bəzilərinizin verdiyi suallar açıq şəkildə hörmətsizlik idi.”
Daha sonra o, konkret olaraq bir jurnalistə üz tutaraq, sual verdiyi zaman kompüterə baxmaq əvəzinə göz kontaktı qurmağı tələb edib:
“Əgər mənim cavabımı almaq istəyirsənsə, sual verərkən gözümə bax. (əlləri ilə jest edərək göstərib) Sonra kompüterə baxmağa vaxtın olacaq.”
Portuqaliya Danimarkaya uduzub
Portuqaliya milli komandası Millətlər Liqasının 1/4 final mərhələsində Danimarka ilə üz-üzə gəlib və 0:1 hesabı ilə məğlub olub. Oyunun yeganə qolunu “Mançester Yunayted”in hücumçusu Rasmus Højlund vurub.
Kriştianu Ronaldu Portuqaliya millisində 218 oyuna 135 qol və 46 məhsuldar ötürmə ilə çıxış edib. Qarşılaşmadan sonra onun mətbuat konfransında emosional davranışı, məğlubiyyətin təsiri ilə əlaqələndirilir.
