Məşhur pop ulduzu Maykl Ceksonun həyatından bəhs edən “Maykl” bioqrafik filmi dünya prokatında gözlənilməz uğurla start götürərək janr üzrə yeni rekord müəyyənləşdirib. Film ilk həftəsonu ərzində qlobal kassada 217,4 milyon dollar gəlir əldə edərək musiqi bioqrafiyaları arasında ən güclü açılış nəticəsini göstərib.
Şimali Amerikada lentə alınan gəlir 97 milyon dollar təşkil edib ki, bu da bu janrda çəkilən filmlər üçün indiyədək qeydə alınmış ən yüksək göstəricidir. Bununla da film 2015-ci ildə 60 milyon dollarlıq start əldə etmiş “Straight Outta Compton”u geridə qoyub. Eyni zamanda, məşhur “Bohemian Rhapsody” filmi də ilk həftəsonu nəticələrinə görə bu göstəricidən geri qalırdı, baxmayaraq ki, sonradan ümumi gəliri 900 milyon dolları keçmişdi.
Tamaşaçı sevgisi rekordlara yol açdı
Film tənqidçilərdən yüksək qiymət ala bilməsə də, tamaşaçıların reaksiyası xeyli müsbət olub. Rotten Tomatoes platformasında cəmi 38% bəyənmə qazanan ekran işi CinemaScore üzrə “A-” qiyməti ilə izləyicilərin rəğbətini qazanıb. Statistikaya görə, auditoriyanın 61 faizini qadınlar, 66 faizini isə 25 yaşdan yuxarı izləyicilər təşkil edib.
Layihənin rejissoru Antuan Fukua olub, baş rolu isə müğənninin qohumu Cəfər Cekson canlandırıb. Bu seçim filmin ətrafında əlavə maraq yaradıb və fanatların diqqətini cəlb edib.
Filmin istehsal prosesi də kifayət qədər mürəkkəb keçib. Təxminən 200 milyon dollarlıq büdcəyə malik olan layihədə bəzi səhnələrin hüquqi səbəblərə görə yenidən çəkilməsi tələb olunub. Süjet əsasən 1988-ci ildə baş tutan “Bad” turnesinə qədər olan dövrü əhatə edir və sənətkarın karyerasının zirvə nöqtələrindən birinə fokuslanır.
Beləliklə, “Maykl” filmi bir daha göstərir ki, kommersiya uğuru yalnız tənqidçi rəylərindən deyil, həm də tamaşaçı ilə qurulan emosional bağdan asılıdır.
