Moldovanın Konstitusiya Məhkəməsi (KM) ölkədə keçirilən prezident seçkilərinin nəticələrini təsdiqləyərək, Mayya Sandunun ikinci müddətə prezident seçilməsini rəsmən elan etdi.
KM sədri Dominika Manole iclasdan sonra qərarı elan edib:
“2024-cü ilin 3 noyabrında keçirilmiş Moldova Respublikasının prezident seçkilərinin nəticələri təsdiqlənir. Mayya Sandunun Moldova Respublikasının prezidenti seçilməsi təsdiq edilir. Bu qərar yekunidir, şikayət verilə bilməz və qəbul edildiyi tarixdən qüvvəyə minir.”
Seçki nəticələri
Mərkəzi Seçki Komissiyasının məlumatına görə, seçkilərin ikinci turunda Mayya Sandu 55,33% səs toplayaraq müxalifətin namizədi Aleksandr Stoyanoglonu məğlub edib. Lakin Moldovada keçirilən səslərin hesablanmasında Stoyanoglo 51% üstünlük qazanmışdı. Sandunun qalib gəlməsində əsas rolu Avropa İttifaqı ölkələrində yaşayan 300 mindən çox moldovalı miqrantın səsləri oynayıb. Hökumət onların səs verməsi üçün Aİ ölkələrində 200-dən çox seçki məntəqəsi açmışdı.
