Azərbaycanda moped istifadəçiləri üçün yeni qaydalar qüvvəyə minib. Artıq bu nəqliyyat vasitələrini idarə etmək üçün sürücülük vəsiqəsi tələb olunur, həmçinin mopedlər dövlət qeydiyyatına alınaraq rəsmi uçota daxil edilməlidir.
Qanunvericiliyə edilən dəyişikliklərə əsasən, 2025-ci ilin dekabrında qəbul olunan yeniliklər martın 26-dan etibarən tətbiq olunmağa başlanıb. Bu addım yol hərəkəti təhlükəsizliyinin artırılması və nəqliyyat vasitələrinin nəzarətə götürülməsi məqsədi daşıyır.
Moped anlayışı və əsas tələblər
Yeni qaydalara görə, moped anlayışı daha dəqiq müəyyən edilib. Bu kateqoriyaya aşağıdakı xüsusiyyətlərə malik nəqliyyat vasitələri daxildir:
- Elektrik mühərrikli və ya mühərrik həcmi 50 kub santimetrdən artıq olmayan vasitələr
- Maksimum konstruksiya sürəti saatda 50 km-dən yüksək olmayan iki və ya üçtəkərli nəqliyyat vasitələri
- Asma mühərrikli velosipedlər və oxşar texniki göstəricilərə malik vasitələr
Bundan əlavə, ölkə ərazisində istifadə olunan bütün mopedlər müvafiq icra hakimiyyəti orqanı tərəfindən qeydiyyata alınmalı və dövlət nömrə nişanı ilə təmin edilməlidir.
Sürücülər üçün yeni qaydalar
Yeni tələblərə əsasən, mopedi idarə etmək hüququ yalnız “A1” kateqoriyalı sürücülük vəsiqəsinə malik şəxslərə verilir. Eyni zamanda, sürücülər yol hərəkəti qaydalarına ciddi şəkildə riayət etməli və mümkün qədər yolun sağ zolağı ilə hərəkət etməlidirlər.
Qanun həmçinin təhlükəsizlik baxımından əlavə məhdudiyyətlər də müəyyən edir. Belə ki, motosiklet və ya mopeddə onun ölçülərindən 0.5 metrdən artıq kənara çıxan və ya idarəetməyə mane olan yüklərin daşınması qadağandır.
Baş Dövlət Yol Polisi İdarəsi də sürücülərə müraciət edərək bildirib ki, bundan sonra moped idarə edən şəxslər aşağıdakı sənədləri təqdim etməlidirlər:
- “A1” kateqoriyalı sürücülük vəsiqəsi
- Nəqliyyat vasitəsinin qeydiyyat şəhadətnaməsi
- Dövlət qeydiyyat nişanı
Qeyd edək ki, bu dəyişikliklər Prezident İlham Əliyevin təsdiqlədiyi qanun və müvafiq fərmanlarla rəsmiləşdirilib və artıq tətbiq mərhələsinə keçib.
