Afrika futbolunun simalarından biri, Nigeriya millisinin sabiq qapıçısı Piter Rufay 61 yaşında dünyasını dəyişdi. Bu barədə ESPN Africa məlumat yayıb.
Mənbənin yazdığına görə, Rufay son illər ərzində uzunmüddətli xəstəlikdən əziyyət çəkirdi. Təəssüf ki, yaxın günlərdə 62 yaşını qeyd etməli olan veteran futbolçu bu yaşa çatmadan vəfat etdi.
Piter Rufay Nigeriya millisinin heyətində 65 oyunda iştirak edib. O, 1994-cü ildə Afrika Millətlər Kubokunun qalibi olub, həmçinin iki dünya çempionatı və iki Afrika Millətlər Kubokunda ölkəsini təmsil edib.
Rufay Avropada bir neçə klubun şərəfini qoruyub. Onun oynadığı klublar arasında Belçikanın “Lokeren” və “Beveren”, Niderlandın “Go Ahead Eagles”, Portuqaliyanın “Farense”, İspaniyanın “Hércules”, “Deportivo” və “Gil Vicente” klubları yer alırdı.
Qeyd edək ki, bundan bir gün öncə — iyulun 3-də Portuqaliya millisinin və “Liverpul” klubunun futbolçusu Diogu Jota və onun qardaşı, “Penafiel”in oyunçusu Andre Silva İspaniyada baş verən avtomobil qəzasında həlak olublar. İlkin məlumata görə, qəza Lamborghini markalı avtomobilin təkərinin partlaması nəticəsində baş verib.
