Bakıda özünü hüquq-mühafizə orqanlarının əməkdaşı kimi təqdim etməklə külli miqdarda dələduzluqda ittiham edilən Ağasəf Quliyevin cinayət işi üzrə məhkəmə prosesi başlanıb. İşə Bakı Ağır Cinayətlər Məhkəməsinin hakimi Namiq Kərimovun sədrliyi ilə baxılır.
Məhkəmədə elan olunan ittiham və təqsirləndirilənin mövqeyi
Prokuror prosesdə ittiham aktını elan edib. Sənəddə göstərilir ki, A.Quliyev tanışına övladını hüquq-mühafizə orqanlarına yüksək vəzifəyə yerləşdirəcəyi vədini verərək 108 min manat alıb.
Bundan əlavə, xarici ölkədən gətirilən avtomobilin gömrük rüsumlarını “həll edəcəyi” adı ilə 25 min manat daha tələb edərək ümumilikdə 133 min manat məbləği dələduzluq yolu ilə əldə edib.
Təqsirləndirilən şəxs ona irəli sürülən ittihamları qəbul etməyərək özünü təqsirli bilmədiyini söyləyib.
İstintaq materiallarında açıqlanan faktlar
İş materiallarına görə, Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinə daxil olan müraciət əsasında 1971-ci il təvəllüdlü Ağasəf Quliyevin fəaliyyətinə hüquqi qiymət verilib.
Araşdırma zamanı məlum olub ki, o, zərərçəkmişə dəfələrlə yanlış məlumatlar təqdim edib, süni telefon danışıqları quraraq “işlərin yolunda getdiyini” deyib və prosesi uzadıb.
İddiaya görə, vətəndaşın şikayət etməməsi üçün o, müxtəlif bəhanələrlə prosesi uzadıb, guya rəsmi yoxlamaların davam etdiyini bildirib.
Əməlin aşkara çıxmasından sonra Cinayət Məcəlləsinin 178.3.2-ci (külli miqdarda dələduzluq) maddəsi ilə cinayət işi açılıb və məhkəmənin qərarı ilə A.Quliyev barəsində həbs qətimkan tədbiri seçilib. Məhkəmə prosesinin davam etdiriləcəyi bildirilir.
