Bakıda Azərbaycan Milli Elmlər Akademiyasında (AMEA) “Aşıq Ələsgərdən Üzeyir Hacıbəyliyə: Türk dünyasının mədəni kodları” mövzusunda beynəlxalq simpozium keçirilib. Bu tədbir görkəmli bəstəkar Üzeyir Hacıbəylinin anadan olmasının 140 illik yubileyinə həsr olunub və Azərbaycan Respublikası Mədəniyyət Nazirliyi, AMEA, Türk Mədəniyyəti və İrsi Fondu və Azərbaycan Milli Konservatoriyasının birgə təşkilatçılığı ilə baş tutub.
Azərbaycan Milli Elmlər Akademiyasının prezidenti akademik İsa Həbibbəyli çıxışında vurğulayıb ki, aşıq Ələsgər və Üzeyir Hacıbəyli Azərbaycan mədəniyyətinin qarşılıqlı tamamlayıcı iki böyük simasıdır. O deyib: “Aşıq musiqisi peşəkar musiqinin əsas qaynağıdır. Üzeyir Hacıbəylinin dünyaca tanınmış əsərlərinin kökləri məhz aşıq musiqisi və xalq mahnılarındadır. Aşıq Ələsgər isə aşıq ədəbiyyatı üçün nizamnamə yaradıb.”
Azərbaycan Mədəniyyət Nazirliyinin müavini Murad Hüseynov isə mədəni irsimizin qorunması baxımından bu ortaq mədəni kodların tədqiqinin vacibliyini qeyd edib.
Türk Mədəniyyəti və İrsi Fondunun prezidenti Aktotı Raimkulova çıxışında türk xalqlarının mədəni irsinin qorunması və təbliği istiqamətində gördükləri işləri diqqətə çatdırıb.
Tədbirdə eyni zamanda Azərbaycan Milli Konservatoriyasının rektoru Kamila Dadaşzadə, Ege Universitetinin Türk Dünyası Araşdırmaları İnstitutundan Metin Ekici, AMEA Folklor İnstitutunun direktoru Hikmət Quliyev və Qazaxıstan Milli İncəsənət Universitetinin nümayəndəsi Meruert Kurmanqalieva da iştirak edərək məruzələrlə çıxış ediblər.
Simpozium 25-26 sentyabr tarixlərində Azərbaycan Milli Konservatoriyasında işini davam etdirəcək.
