Azərbaycan Prezidenti İlham Əliyev bildirib ki, ölkənin müstəqilliyini bərpa etməsindən sonra əsas hədəf torpaqların işğaldan azad olunması olmuş və bu məqsəd uğurla reallaşdırılıb. Dövlət başçısı Türkiyə, Yunanıstan, Macarıstan, Monteneqro, Niderland, Şimali Makedoniya, Norveç, Slovakiya, Sloveniya, İsveç, Çexiya, Portuqaliya və İspaniyanın NATO-dakı daimi nümayəndələri, həmçinin ABŞ və Fransanın NATO nümayəndələrinin müavinlərindən ibarət heyətlə görüşündə Azərbaycan Ordusunun müasirləşdirilməsi prosesinin bundan sonra da ardıcıl davam etdiriləcəyini diqqətə çatdırıb.
İlham Əliyev NATO mənzil-qərargahına səfərlərində Əfqanıstandakı əməliyyatlara dəstəyin Azərbaycanın alyans ilə əməkdaşlığında vacib amil olduğunu qeyd edib. Bununla yanaşı, regional inkişaf, enerji təhlükəsizliyi və digər sahələrdə də Azərbaycanın NATO ilə əlaqələrinin genişləndirildiyini vurğulayıb.
Prezident bildirib ki, Azərbaycan Ordusu NATO standartlarına uyğun qurulub və bu çərçivədə Türkiyə ilə sıx əməkdaşlıq mövcuddur. Alyansla əlaqələrin davamlı dərinləşməsi Azərbaycanın müdafiə və təhlükəsizlik strategiyasında əsas yer tutur.
