Azərbaycan çempionu “Qarabağ” bu gün UEFA Avropa Liqasında növbəti oyuna çıxacaq.
Daylinews-az.com xəbər verir ki, Ağdam klubu turnirin Liqa mərhələsinin IV turunda Norveçin “Bodo Qlimt” komandası ilə qarşılaşacaq. İlk üç oyunda məğlub olan Qurban Qurbanovun komandası bu dəfə Norveç səfərində ilk xallarını qazanmağa çalışacaq.
Matç Norveçin “Aspmyra” stadionunda baş tutacaq və Bakı vaxtı ilə saat 21:45-də başlayacaq.
Qeyd edək ki, “Qarabağ” indiyədək səfərdə “Tottenhem”ə 0:3, evdə “Malmö”yə 1:2 və “Ayaks”a 0:3 hesabı ilə məğlub olub. Təmsilçimizin növbəti qarşılaşması noyabrın 28-də Bakıda Fransanın “Lion” komandasına qarşı olacaq.
