Qafqaz Müsəlmanları İdarəsi (QMİ) Həcc ziyarətinə niyyət edən Azərbaycan vətəndaşlarına müraciət edərək, qeydiyyat prosesində tələsməyin vacibliyini bildirib. QMİ Xarici Əlaqələr şöbəsinin müdiri və Həcc elektron sisteminin rəhbəri Vüsal Cahangiri qeyd edib ki, Səudiyyə Ərəbistanı Krallığının Həcc və Ümrə Nazirliyi illərdir ki, hazırlıq prosesini daha erkən başlamaq üçün yeni mexanizmlər tətbiq edir.
Bu il də Nazirlik, əvvəlki ziyarət başa çatdıqdan qısa müddət sonra növbəti Həcc üçün sənəd qəbuluna başlanması barədə bütün dünya missiyalarına göstərişlər göndərib. Müvafiq olaraq, vizaların verilməsi prosesinin də daha tez başladılması və Ramazan ayının sonunadək yekunlaşdırılması planlaşdırılır.
Vüsal Cahangiri Həcc niyyətində olan vətəndaşlara belə bir xahişlə müraciət edib: “Həccə niyyəti olan vətəndaşlarımızdan xahiş edirik, vaxtın genişliyinə baxmasınlar, yerlər bitmədən gəlib qeydiyyata alınsınlar.”
Rəsmi qeydiyyata erkən başlanılmasına baxmayaraq, hər gün zəvvarlar qeydiyyat üçün müraciət edirlər. QMİ rəsmisi əvvəlki illərin təcrübəsinə əsaslanaraq xəbərdarlıq edib. Mövsümün sonuna yaxın xeyli sayda vətəndaş müraciət etsə də, həmin ərəfədə artıq təyin olunmuş kvota tamamlanır və bu səbəbdən müraciət edənlər ziyarətə gedə bilmirlər. Bu səbəbdən, Həcc etmək istəyən hər kəsə vaxt itirmədən QMİ-yə müraciət etmələri tövsiyə olunur.
