Milli Məclisin Regional məsələlər komitəsinin sədri Siyavuş Novruzov bu gün keçirilən plenar iclasda ölkədə ağır xəstəliklərlə bağlı pulsuz dərman təminatı məsələsinə toxunub. Xəbər verir ki, o bildirib ki, onkoloji xəstəliklər, şəkər, böyrək çatışmazlığı, qan çatışmazlığı kimi ciddi xəstəliklər üçün pulsuz dərman verilir.
Deputat vurğulayıb ki, şəhərin bir küçəsində 20 aptek ola bilər, lakin bu xəstələr üçün yalnız hər rayonda bir aptek həmin dərmanları paylayır: “Belə xəstələr səhər saat 6-dan həmin aptekin qarşısında olur, dərmanın verilməsi üçün növbə gözləyirlər. Məncə, aidiyyəti qurumlarla bu məsələni müzakirə edib, ən azından hər rayonda bir neçə aptekdə bu pulsuz dərmanların verilməsi təmin edilməlidir”.
Siyavuş Novruzov bu problemin həlli üçün aidiyyəti dövlət orqanları ilə dialoqun önəmini vurğulayıb və xəstələrin öhdəliyinin azaldılmasının vacib olduğunu bildirib.
